Situasaun ne’e halo komunidade sira ezije ba órgaun lezisladór sira hanesan reprezentante povu iha uma fukun Parlamentu Nasionál (PN) atu prodús Lei ne’ebé halakon duni situasaun ne’e husi nia abut, maka Lei Pena Perpétua ba autór.

Komunidade Ercio Campos hateten, tuir lolo’os kazu iha Raikotu, la merese atu akontese iha país demokrátiku ida hanesan Timor-Leste (TL).

Nia dehan, Konstituisaun RDTL ko’alia kona-ba ema idaidak nia direitu universál, maibé governu laiha garantia, tanba realidade povu kontinua moris iha situasaun tauk nia laran no sente inseguransa iha sira nia-an.

"Prímeiru husi ita nia lei la garante, entaun ema hotu moris lahatene nia tauk ka nia seguransa, ne'e atu la'o halo nusá. Ba oin, no ba kotuk mós ladiak, la'o la avontade. Piór liu mak akontese ema óho malu la para", Ercio Campos ba www.tempotimor.com, via telefone (13/11).

Tuir nia, ema barak sai ona vítima tanba laiha justisa serteza iha TL, ema ne'ebé halo kríme ba kadeia tinan 6 de’it no balun tama fulan neen (6) de'it sai ona.

Tanba ne'e, nia husu ba deputadu sira iha PN atu hare ona lei hodi fó pena ne'ebé todan (pena morte) ba autór sira, atu labele la'o lívre.

"Ema sira iha Parlamentu hare ona situasaun ida ne'e, ema oho malu aumenta beibeik, ha'u haree ne'e labele, sira (deputadu) tenke haree ona, tenke iha pena de morte", dehan nia.

Ba kestaun ne'e, deputadu bankada Partidu Congressu Nasionál Rekonstrusaun Timorense (CNRT), Duarte Nunes hateten, iha konstituisaun RDTL la permite atu fó pena morte ba autór kazu omesídiu sira.

Tuir nia, Tribunál Rekursu (TR) mak hatene liu klafisikasaun pena ba ema autór sira ne'ebé halo ho aat hodi halakon ema seluk nia vida.

"Oho ema barak, buat sira ne'e tenke kuidadu atu nune’e fó mensajen katak, labele akontese beibeik", nia hateten.

Nia dehan, TR tenke halo diferénsia ba kazu sira, tanba kazu entre ema barak mate ho ema ida de’it mak mate, nia gravidade la hanesan, tanba ne’e nia husu mós ba família sira atu aprezenta dadus klaru, hodi ajuda TR hola desizaun ho lolo’os.

"Ita nia lei laiha pena morte. Mais lei másimu ne'e iha, agora sé mak tetu ne'e juiz, la'ós ami polítiku sira. Aplikasaun ne'e mak tenke haree tuir nia gravidade ne'e", nia esplika.

Entretantu, kazu asasinadu ne'e hala'o husi suspeitu LH hasoru vítima inan ho oan iha Raikotu, aldeia Terrsa Santa, suku Madohi, postu administrativu Dom Aleixo, munisípiu Díli.

Akontesimentu ne'e mosu iha loron (31/10), maizu-menus tuku 01:07 madrugada hodi rezulta vítima Domingas Soares (inan) mate fatin no Limdy Moy (oan feto) hetan kanek iha liman ho kakorok parte sorin karuk.(*)

 

PUBLISIDADE