MP sei halo akuzasaun, bainhira konklui ona prosesu investigasaun ne'ebé Ministériu Públiku (MP) hamutuk ho Polísia Nasionál Sientífika Investigasaun Kriminál (PNSIK) halo.

Prokuradór Jerál Repúblika (PJR) José da Costa Ximenes hateten, arguidu daudaun ne’e iha ona prizaun preventiva, tanba ne'e molok tama tinan oin, MP akuza ona suspeitu ba kazu omesidu agravadu ne’e.

"Krime ne'ebé posivelmenta ita imputa ne'e mínimu liu krime tolu, maibé bele aumenta tan, mak hanesan omesidu agravadu ne'ebé pena prizaun husi tinan tinan 12 to'o 25, omesidu tentadu, estragus danu, inklui arma branka," dehan PJR José iha Palásiu Prezidensiál bairru-pite, Dili, Segunda (16/11).

Bazei ba kazu refere, iha semana kotuk mós Ministériu Públiku (MP) rona ona parte husi vítima Amoe.

"Ita rona ona vítima iha semana kotuk, entaun ha'u bele permite ba ita boot sira katak molok Dezembru remata, ita akuza ona arguidu," nia dehan.

MP mós kontente tanba ema barak mak hahú konxiente, ba omesidu ida ne'e ida ne'e, husi omesidu bar-barak ne'ebé ita iha, ne'ebé sosiedade sivíl no sosiedade sira presiza preokupa.

"Ida ne'e omesidu agravadu ida ne'ebé kona familia ida ne'e, iha mós omesidu sira seluk ne'ebé mós boot, kuandu Ministériu Públiku (MP) ko'alia ne'e tanba balun atinje ema nia vida, balun atinje ita-nia sosiedade. Hanesan droga, brankamentu kapitais, korupsaun, prátiku umanu, ne'e atinje sosiedade jerál, tanba ne'e mak ita estabelese gabinete kombate krime organizadu," José subliña.(*)

PUBLISIDADE