Nia dehan, Tribunál Oekusi agora prosesu la boot no la’o ho normal. Ida seluk maka iha Tribunál Munisipiu Baukau ne’ebé iha tinan ne’e prosesu pendente ida ki'ikoan liu kompara ho Tribunál Dili no Suai.

"Agora iha de’it ona 100-tál prosesu pendente kompara ho tinan kotuk”, relata Deolindo, iha Palásiu Prezidensiál Bairru-Pité, Segunda (15/4).

Nia dehan, husi statistika Tribunál Dili sei iha pendente ne’ebé boot. Prosesu pendente iha primeira instansia ne’e kuaze 3.500, tanba iha kapitál ne’e la’os númeru prosesu de’it, maibé iha mós komplexidade prosesu ne’ebé iha.

Nune'e, Tribunál Rekursu rasik mos iha prosesu balun ne’ebé pendente kuaze 200 kompostu husi kazu sivil no kriminal, maibe iha juiz na’in lima ne’ebé tenta atu diminui prosesu sira ne’e ho forma lalais liután.