"Relatóriu 2019 nian, iha kazu 73 mai husi instituisaun 10 ne'ebé ami identifika iha 2019 nian. Entretantu kazu 73 ne'ebé mak iha, deklarasaun mai husi Ministériu Públiku (MP) hamutuk kazu 60," dehan Komisáriu KAK Sergio Hornai ba jornalista sira, iha PN, hafoin remata aprezentasaun relatóriu anuál KAK nian ba deputadu sira, iha PN, Tersa (26/05)

Nia mós dehan, kazu neen-nulu ne'ebé husi MP ba KAK ne'e, kazu 43 mak investigadu ona.

"Husi kazu neen-nulu ne'e depois halo inkéritu ka investigasaun ne'ebé KAK halo, liuhusi investigadór sira, mak iha kazu 43 ne'ebé ita submete ona ba MP, para sira promove ba iha akuzasaun ka arkivamentu parsiál ne'ebé depende ba kompeténsia MP nian," dehan Sergio

Lidér KAK ne'e mós akresenta katak, kazu ne'ebé KAK rekolla mak kazu korupsaun sira.

"Iha iha kazu pekulatu de uzu, tráfiku de influénsia, a busy poder, enrikexementu ilísitu, Partisipasaun ekonómika no negósiu, nomós administrasaun danoza inklui falsifikasaun no krime koneksu sira ne'ebé nakait ba iha tipu krime korupsaun ninian ke (que) posibilita ba to'o iha money laundry, tráfiku umanu no seluk tan," Sergio esklarese.

Nia mós afirma, KAK la'ós halo investigasaun de'it, maibé KAK mós halo servisu iha parte sira seluk hanesan prevensaun no seluk tan

"KAK mós halo iha área prevensaun ninian, sensibilizasaun públika, balun mak halo stok, balun mós halo vizita surpreza sira ba instituisaun nomós estudu ba instituisaun sira para rekolla informasaun sira ne'ebé iha, tuir ona padraun ka prosedimentu sira ka lae," nia afirma

Entretantu instituisaun sanulu ne'ebé iha relatóriu anuál KAK nian, rejista kazu sira iha Ministériu sira, hanesan Ministériu Interiór (MI) Ministériu Justisa (MJ), Ministériu Edukasaun Juventude no Desportu (MEJD), Polísia Nasionál Timor-Leste (PNTL) nomos instituisaun sira seluk hamutuk sanulu.