Xefe Bankada FRETILIN, David Dias Ximenes 'Mandati' hatete, nia parte lakohi kometa kona-ba desizaun tribunál aplika Termu Identidade Rezidénsia (TIR) ba Arguidu na'in-9 ne'ebé deskonfia envolve kazu droga maibé husu tribunál atu iha seriedade wainhira foti desizaun ruma.

“Ha'u ema ida ke, lakohi envolve to'o iha ne'ebá, ha'u lakohi dezautoriza ita-nia Tribunál, ha'u husu de'it mak sira-nia seriedade, sira-nia imparsialidade sira-nia intergridade, kuandu halo desizaun. Porque sosiedade tomak iha nasaun ida, kuandu ita-nia justisa mak dezautorizadu ne'e ita bele dehan katak, sosiedade ne'e hanesan fali buat ida (siapa yang kuat itu yang menang) ne'e labele”, dehan nia iha PN, kuarta (24/08).

Maibé ba situasaun ida-ne'e mídia no públiku tomak iha papél atu halo kontrolu ba ida-ne'e tanba ema hotuhotu iha interese, no objetivu ida oinsá bele koresponde ba pontu tolu pertinente ba Estadu iha área seguransa, justisa, no ikus liu mak atu moris di'ak.

Ba kazu droga ne'e rasik Bankada FRETILIN haree katak iha Lei númeru 2/2017 ne'e forte atu kondena maibé lahatene dala-ruma iha konsiderasaun barak ne'ebé juis sira ko'alia ona, tanba ne'e nia parte lakohi komenta to'o iha ne'ebá.

Vise Xefe Bankada CNRT, Patrocínio Fernandes Konsidera ladún iha razaun ne'ebé forte ba Tribunál atu hatete katak lei la forsa tanba faktu ida-ne'e laiha diferente entre ho kazu ne'ebé akontese ba matebian Juga Gama.

“Tanba ita iha faktu laiha diferensa entre konsumidór ba droga ne'e, tanba faktu hatudu ona, konsumidór balun ke lei konsege duni kondena ba to'o kadeia to'o mate iha prizaun laran, seidauk ba to'o iha prosesu julgamentu ba prizaun hanesan prizaun preventiva entaun ne'e saída mak lori sira (Tribunál) bele iha kbi'it, bele iha kompeténsia para lori ema ne'e ba to'o iha prizaun preventiva, ne'e katak tanba lei mak hatudu dalan”, esplika nia.

Maibé ba kazu droga ne'ebé komete husi arguidu na’in-9 ne’e Tribunál hola desizaun ne'ebé kontráriu oituan ho sira seluk, ida-ne'e bele foti ona konkluzaun katak la'ós lei mak la forte.

“Iha parte ida-ne'e ita hanoin katak husu liliu ba setór justisa ho sira ne'ebé servisu iha área justisa atubele servisu ho profesionál servisu ho imparsialidade hodi servi Estadu ne'e”, dehan nia. (*)