"Foin dia 16 fevereiru simu tomada de pose, agora ha'u nia mandatu tinan haat, ha'u koko esforsu rezolve problema infraestrutura bázika iha suku sira," dehan Domingos iha kna'ar fatin Laga, tersa (22/02).

Tanba, komunidade ne'ebé hela besik estrada asesu ona eletrisidade, maibé hela dook husi estrada hanesan Suku Soba Boleha, Samalari Desagua no Sagadate, seidauk asesu.

Nune’e mós komunidade ne'ebé seidauk asesu estrada mak husi Suku Sagadate parte Sirabu'u Aubuti, Beliuaili inklui Auraba, Suku Aterali parte Borodua, Suku Libagua, Suku Samalari Desagua.

Suku ne'ebé sei preukupa ba bee moos iha Postu Administrativu Laga mak Suku Samalari, Sagadate, Nunira inklui Suku Libagua.

"Bee moos iha Laga laran mós susar oituan, bee moos laiha, ba fali Suku seluk, bee iha okos populsaun iha leten, tanba ne'e ita presiza halo komunikasaun ho estadu, oinsá bele dada bee ba ita nia komunidade," nia hatete

Xefe Suku Soba, Francisca Monica de Fatima Soares hatete, Suku Soba dook husi Postu Laga ho iha Aldeia haat hanesan, Boleha, Asanunu, Fatiliri inklui Laikua to'o ohin loron seidauk asesu eletrisidade.

"Tama ona planu, maibé seidauk realiza to'o agora, razaun orsamentu mak laiha ga, razaun tanba saidá ami lahatene, maibé ami nia planu desde uluk, foin dadauk sira EDTL mai tiha ona survey ne'ebé hein de'it," nia hatete

Enkuantu Postu Administrativu Laga iha Suku 8 hanesan, Suku Atelari, Libagua, Nunira, Saelari, Sagadate, Salamari, Soba inklui Tekinaumata no Aldeia 52, Xefe familía rihun 4.656 ne’ebé ho totál populasaun rihun 22.486. (*)