“Uluk nana'in fó de'it parabéns ba MAEKOM bele realiza fatin ida ne'e, segundu atu dezafia de'it atu asegura ninia sustentabilidade ba oin, tama iha situasaun balun, tanba iha tinan 2019-2021 restaurante barak taka, ita hein nafatin ba oin kontinua asegura nafatin sustentabilidade”, dehan SEKOOP Elizário Ferreira iha lansamentu Kréditu ba membru kooperativa iha Bidau, sesta (18/02).
Alende ne'e SEKOOP husu MAEKOM kontinua sai sentru ba ai-hán lokál iha Timor-Leste atu atrai Timoroan sira hodi konsumu ai-hán lokál sira iha Restaurante MAEKOM nian.
“Tanba ho produtu ne'ebé lokál asegura ita-nia hahán ne'ebé orgánika ba ita-nia saúde rasik iha família”, afirma nia.
Alende ne’e hato'o parabéns ba kooperativa sira iha MAEKOM nia okos ne'ebé atribui kréditu ba membru sira, hodi nafatin asegura valór prinsípiu kooperativa nian, hodi asegura bem estar nian.
“Tanba objetivu bem star kooperativa nian mak asegura bem estar membru kooperativa sira-nian”, esplika nia.
Prezidente Fundasaun Movimentu Asaun Ekonomia Komunitáriu (MAEKOM), Rui Castro informa, membru kooperativa sei asina akordu tolu ho SEKOOP hodi halo fila liman.
“Kooperativa Pioneira da Agroindustria (AIPCOOP) ne'ebé foku ba imprestimu ba to'os na'in haki'ak na'in no natar na'in sira hodi halo bisnis”, dehan nia.
Nune'e iha lansamentu ne'e AIPCOOP asina akordu tolu ho Sekretária Estadu Kooperativa husi Munisípiu Ainaru ba natar na'in ne'ebé reprezentante husi Ainaru no asina akordu ba sosa Mike's Chicken reprezentante koronél Domingos da Cámara, no asina akordu emprestimu ho haki'ak na'in husi Metinaro reprezentante Simão Mendonça.
Alende ne'e Prezidente Kooperativa Pioneira da Agroindustria (AIPCOOP), João Pequinho hatete, estabelesementu kooperativa ne'e atu responde ba problema menus produsaun sira iha rai laran.
“AIPCOOP estabelese hodi responde ba problema menus produsaun iha rai laran, no nia sai fasilidade hodi intensifika agroindustria, aquakultura no ortikultura hodi hasa'e produsaun ai-hán lokál, asegura seguransa alimentár promove ekonomia sustentável no hakbi’it dezenvolve komunitária”, afirma nia.
AIPCOOP nu'udar kooperativa ida multisetorál ne'ebé iha MAEKOM nia okos ne'ebé mak haree liuba produsaun agroindustria, akuakultura no ortikultura hodi hasa'e produsaun ai-hán lokál iha Timor Leste. (*)
