Ministru Prezidénsia Konsellu Ministru, Fidelis Leite Magalhães hatete, Projetu Rezolusaun Governu nian, ne’ebé aprezenta husi Vise-Ministra Finansas, Sara Lobo Brites, define sé mak integra ba kada komisaun tolu ne’e ida hodi konstitui estrutura administrativa responsavel ba realizasaun Sensu tinan 2022.  

Komisaun tolu ne’ebé konstitui iha estrutura hanesan komisaun nasionál sensu 2022 ne’ebé hanesan iha misaun orientasaun polítika no administrativa husi atividade sensitária, nune’e mós mobilizasaun rekursu umanu no materiál nesesáriu sira.

Iha mós Komisaun téknika sensu 2022 nian ne’ebé sei halo avaliasaun téknika ba atividade sentsitária, revizaun instrumentu sensitária sira no rekomendasaun husi prátika di’ak sira ba rekolla no tratamentu dadu nian.

Nune’e Komisaun publisitasaun sensu 2022 nian ne’ebé sei responsabiliza hodi informa no prepara públiku jerál ba atividade sensitária.

Resenseamentu Jerál Populasaun no Abitasaun ne’e iha objetivu prinsipál sira ba kontajen no karaterizasaun populasaun ne’ebé rezidente iha Timor-Leste, nune’e mós levantamentu ba alojamentu ne’ebé eziste no ninia kondisaun sira abitalidade nian, mediante hodi rekolla ezaustiva elementu no dadus sira, ne’ebé realiza husi meiu operasaun sira inkéritu no tratamentu estatístiku nian. (*)