“Prosesu ba teste ida ne'e, ita atu prepara ita-nia kandidatu sira ba work kredit pull ba PLS ninian. Planu ne’e prepara husi DNEE hodi tau iha sistema Work Credit Pull ba PLS ninian”, dehan Diretór Nasionál Diresaun Nasionál Empregu Exterior, Filomeno Soares, iha Salaun Sentru Treinamentu Vokasionál Joventude (STVJ), Bekora, Kamea, tersa (15/02).
Tanba Programa PLS ne'e ninia ezijensia ba merkadu nian koñesementu ne'ebé mais altu entaun liga ba formasaun tékniku ne’ebé ida-idak iha no ema ne'ebé tenké hatene lian Inglés di’ak mak bele aplika.
Ba kandidatu ne’ebé aplika ba programa ne'e liuhusi sistema online por volta 4.000 pesoál, no kandidatu ne'ebé liu atu tuir teste hamutuk 794 pesoál mak sei tuir teste eskrita depois ida ne'e sei tuir teste entervista.
“Ba kandidatu ne'ebé liu iha teste eskrita sei tuir teste enterviu iha kinta-feira semana ne'e (17/02)”, informa nia.
Teste agora dadauk hala’o, la siknifika sira liu atu ba Austrália maibé atu prepara ba sistema Work Credit Pull ba Programa PLS nian. Tanba Sistema Work Credit Pull ne'ebé prepara ba programa PLS ne'e, nia durasaun míninu tinan ida no másimu tinan tolu.
“Maibé agora ami husu ba kandidatura sira mak tenke prepara-an didi’ak tanba xave atu liu ka la liu ne'e iha sira, ami hanesan fasilita de’it sira”, dehan nia.
Reprezentante Traballadór Timoroan ba Programa PLS, Alexandrino Duarte hatete, nia agradese tebes ba programa PLS tanba bele kria kampu traballu ba joven sira.
“Programa ida ne'e bele hakama’an no sai oportunidade ba joven sira bele partisipa iha ne'e. Tanba ne'e joven sira tenke kreativu atubele kompete iha nasaun seluk”, dehan nia.
Maibé Kandidatura ne’e, fiar-an tanba iha programa PLS ne'e, prioridade liu ema sira ne'ebé hetan ona sertifikadu husi Sentru Formasaun akredita ona iha Instituto Nacional de Desenvolvimento de Mão- de-Obra (INDMO).
“Ami ne'ebé tuir programa ida ne'e, maioria husi Sentru Formasaun ne'ebé akreditadu enkuantu materia ne’ebé sei uza ba teste ami hetan antes ona”, afirma nia.
Ba dokumentu ne’ebé presiza liu iha programa ne’e mak Sertifikadu husi Sentru Formasaun ne’ebé akredita ona husi INDMO, Karta Deklarasaun husi Sentru Formasaun, Diploma ikus no Fotografia husi Kandidatura. (*)