“Protesaun Sivíl ninia papél mak apoiu kona-ba dezastre sira, ida ne'e ita apoiu bombeiru mai hamate tiha ahi ona, ita haree filafali ba vítima mós laiha depois iha chek laiha ema ida ke hela iha ne'e, fatin ne'e dala de'it obralan de'it no kalan sira fila ba uma, normalmente kuandu fatin ahi hán hanesan iha uma, iha dapur, hahán iha ne'ebá ida ne'e Protesaun Sivíl apoiu kedas sasán emerjénsia ruma, mais komu ema laiha, ida ne'e ita halo observasaun hamutuk ho nafatin Autoridade Munisipál sira depois hasa'e relatóriu ba Ministériu relevante sira liliu Ministériu Komersiu Industria sira karik sira iha apoiu ruma ba negosiante ruma ida ne'e mak ita sei bele halo”, dehan Sekretáriu Estadu Joaquim iha Manleuana, segunda (14/02).
Tanba papél Protesaun Sivíl nia atu apoiu dezastre naturál sira inklui mós Insendiu sira maibé foka liu ba prioridade ba uma na’in komunidade sira ne'ebé sai sira-nia hela fatin.
Maibé hanesan parte merkadu Manleuana ne'ebé mak komunidade sira la hela Sekretária Estadu nia apoiu mak bombeiru hamate ahi iha fatin akontesimentu sira maibé laiha tan apoiu seluk husi SEPS.
Prezidente Autoridade Munisípiu (PAM) Dili, Guilhermina Filomena Saldanha Ribeiro hatete, sasán sira ne'ebé mak estragu nia parte sei tur hamutuk hodi responde iha tempu badak.
“Ida ne'e infraestrutura Estadu no ami sei tur hamutuk entaun saida mak Estadu nia responsabilidade atu haree oinsá atu hadi’a fali infraestrutura ne'ebé mak iha”, afirma nia.
Maibé sasán sira ne'ebé mak ahi hán ne'e Estadu nia parte sei hadi’a filafali hodi komunidade sira bele dalan filafali iha tempu badak.
Deputadu Bankada Partidu Demokrátiku (PD), Adriano do Nacimento, husu ba Governu atu fó apoiu hodi rezolve situasaun insendiu ne’ebé akontese iha Merkadu Manleuana.
“Ha'u husu Governu atu tau atensaun ba asidente ida ne'ebé ohin dadersan akontese iha Manleuana ke ahi hán mutuk merkadu Manleuana”, hatete nia iha plenária PN, segunda (14/02).
Ba asidente ne’e, Governu presiza tun haree no identifika dalan oinsá mak bele ajuda rekupera komunidade sira ne'ebé afeta asidente ida ne'e.
“Tanba fa’an obralan, fa’an modo, ho tesik ne'eba susar tebes situasaun hanesan ne'e. Maibé ahi hán dadauk ona sira-nia sasán ho kios ka uma oan sira ne'e, se bele Governu tau atensaun”, afirma nia. (*)
