“Traballadór sira ne’e hetan kontratu husi kompaña ne’ebé mak sira uluk ba servisu no Traballadór sira ne’e ho totál 26 pesoál, iha feto na'in-5 no mane 21, traballadór sira nee’ sei destaka ba Kompaña 3 hanesan Adco, Tous Garden, no Burlington. Traballadór sira ne’e sei ba Austrália iha loron Kuarta dia 16 feveiru semana”, dehan Sekretáriu Estadu Formasaun Profesionál no Empregu, Alarico do Rosario, Alarico iha seremónia despedida no asina deklarasaun ba Traballadór sira iha Salaun DNEE, Bekora, segunda (14/02).

Traballadór sira ne’ebé sei haruka ba Austrália la’ós kandidatu foun, maibé traballadór sira ne’e antes ne’e labele halo viajen, tanba hetan impedimentu husi Covid-19.

“Ita-nia traballadór sira ne’ebé sei haruka ba Austrália ne’e la’ós kandidatura foun maibé sira ne’e traballdór uluk nian ne’ebé ba ona, lolos ne’e sira ba antes maibé tanba Covid-19 entaun la ba no foin mak atu ba”, hatete nia.

Traballadór sira ne’ebé atu ba tenke asina akordu hamutuk ho SEFOPE atu sira labele halai ilegál tamba iha traballadór barak mak halai ilegál, Traballadór sira ne’e hanoin no hadomi Timor no família no lalika halo kontra regra servisu to’o fila mai Timor-Leste.

Reprezentante Traballadór Timoroan, Cerilio Guilhermino Soares, sente orgullu tebes ho prezensa Sekrétariu Estadu Profesionál Emprego (SEFOPE) no Diretór Diresaun Nasionál Empregu Exterior ne'ebe fó hanoin no motivasaun kona-ba oinsá serbisu iha Austrália.

“Sim ha’u serbisu ona iha Austrália durante tinan 1 ho balun no agora ha’u ba Austrália ne'e hanesan faze daruak nian. Durante ha’u servisu iha Austrália fila mai osan sira ha’u investa ba nessesidade uma laran nian hanesan, haruka oan ba eskola, hadi’a uma, hola transporte no bele ajuda mós família sira”, dehan nia. (*)