“Tuir lolos konkursu ne’e taka iha outobru 2020, maibé tanba impaktu pandemia globál Covid-19 no restrisaun ba viajen internasionál tomak nomós haree filafali ba ambiente kreximentu indústria petróleu nian, liliu iha parte investimentu upstream la’o ladun di’ak, nune’e ita konsege extende to’o inísiu tinan 2022, entaun ohin ita taka”, informa Diretór Explorasaun no Promosaun Autoridade Nasionál Petróleu no Minerál (ANPM), Mateus da Costa, iha salaun ANPM, Ministériu Finansa, Aitarak-laran, sestá (14/01).
Konkursu ba bloku 18 ne’e, 11 iha tasi laran no hitu iha rai-maran, ne’ebé antes ne’e Governu Timor-Leste lansa iha 03 loron outubru 2019.
Rekerimentu submisaun dokumentu liuhusi online, ne’ebé kria iha sítiu online ida no empreza sira ne’ebé hetan ona access pass (username no password) husi ANPM mak bele ba upload rasik sira-nia dokumentu iha sítiu.
“Dokumentu sira ne’ebé konkorrente-sira manda ba email, ita sei la konsidera maibé ita sei fó hatene ba sira atu upload diretamente iha online. Mekanizmu ne’e ita foti atubele fasilita empreza hotu husi rai ne’ebé de’it, tantu husi rai-laran no rai-li’ur atu sira la presiza fízikamente mai hatama dokumentu maibé submete de’it via online”, hatutan nia.
Antes tama faze ne’e, ekipa halo esforsu revizaun ba dokumentu hirak ne’ebé empreza hatama, hodi haree profile inklui kapasidade téknika no finanseira, hodi nune’e bele konkore ba prosesu konkursu faze dahuluk.
“Prosesu submisaun dokumentu pré-kualifikasaun, bázikamente ita haree liuba empreza nia kapasidade téknika no finseira, bainhira sira halo submisaun dokumentu la kompletu ne’e laiha problema, tanba ita sei haree no bainhira iha dokumentu ne’ebé falta, ita sei komunika ba sira hodi halo aprosimasaun hodi bele kompleta”, akresenta nia.
ANPM nia objetivu mak haree empreza sira tenke iha kualifikasaun no kapsidade hodi bele konkorre ba konkursu ne’ebé sei loke hahú iha loron 24 janeiru.
Antes ne’e, ANPM ho kolaborasaun parseiru, organiza no partisipa iha simeira internasionál via virtuál hodi halo promosaun ba konkursu públiku petrolíferu bloku 18.
Prosesu evaluasaun ba submisaun dokumentu pré-kualifikasaun ne’e, normalmente bainhira empreza hatama, ekipa sira halo revizaun ba dokumentu no bainhira iha nesesidade ekipa sei responsável komunika ba reprezentante empreza atu klarifika ka kompleta dokumentu balun ne’ebé falta, hodi nune’e bele tulun ekipa téknika finaliza evaluasaun molok rekomenda ba jestór sira foti desizaun. (*)
