"Ami sempre fó hanoin ba sira tanba moras ida ne'e Korea la aseita para moras ida ne'e atu tama iha ne'ebá hanesan, Siphilis, Tubercoluse, depois ho Hepatitis ne'e”, dehan Filomeno Soares iha seremónia asina deklarasaun ho traballadór nia inan aman iha Salaun DNEE, Bekora, kuarta (24/11).

Maibé durante ne'e seidauk iha Timoraon ida ne'e mak afeita ba moras tolu ne'ebé, bainhira halo teste saúde.

"Maibé kuandu iha mak teste ralarua mak hetan moras tolu ne'e otomatikamente deporta fila”, afirma nia.

Tanba ne'e, traballadór sira presiza kuidadu sira-nia saúde molok aranka ba estranjeiru.

Nune’e  iha loron 26 fulan-novembru Governu Timor-Leste sei haruka tan traballadór mane 21 ba Korea Súl hodi Servisu iha área peska.

"Servisu iha tasi laran, entaun ita-nia traballador feto la inklui, maibé mesak mane de'it”, dehan nia.

Salvador Santos Gomes, nu'udar maun husi traballadór Noe Santos husu atu traballadór sira kuidadu-an bainhira aranka ba Korea.

"Iha responsabilidade boot ne'ebé Governu kaer hamutuk ho inan aman oinsá mak atu kuida, lia menon mak ne'e karik sira ekipa boot ida ba sira hanesan família boot ida, sira tau matan ba malu, hodi hanoin ba família no responsabilidade inan aman hodi tau matan hamutuk”, dehan nia.

Alende ne'e, SEFOPE mós husu ba traballadór nia inan aman inklui nia feen sira koopera hamutuk ho Governu hodi tau atensaun ba traballadór iha Korea.

Traballadór sira ne'e molok aranka sei hela iha izolamentu espesiál ida, hodi evita moras Covid-19 ne'ebé sai risku no impedimentu ba viajen traballadór sira-nian.

Iha fulan kotuk liuba traballadór ida migrasaun husi Malázia kansela hodi kontinua viajen ba Korra Tanba afeita moras Covid-19.

Maske iha Timor-Leste Ministériu Saúde halo ona teste swab molok traballadór hirak ne'e aranka ba Korea. (*)