“Iha oportunidade ida ne'e, ha'u hakarak hato'o ha'u-nia agradese ba CVTL nomós ba Voluntáriu sira tomak, ba estrutura CVTL nian ne'ebé mak halo sira-nia servisu, liliu atendimentu ne'ebé mak lais iha oras tolu nia laran, bele atende ona ita-nia komunidade sira ne'ebé mak hasoru dezastre naturál ida ne'e”, dehan nia hafoin partisipa seremónia aniversáriu Cruz Vermelha de Timor-Leste (CVTL) ba dala-XXI iha Formoza, tersa (22/06).

Durante ne'e CVTL hala'o nia programa barak, atividade barak ne'ebé la'ós iha Dili de'it, maibé to'o mós iha área rural sira.

“Iha ha'u-nia vizita ida, ha'u hasoru duni voluntáriu joven sira ne'ebé iha esperitu maka’as tebes, hakarak kontribui atu hadi’a di'ak ba komunidade sira iha área rural”, dehan nia.

Haree ba joven sira halo programa ne'ebé mak CVTL trasa ona iha tempu ne'ebá, no  hato'o agradesementu ba fundadór sira ne'ebé hari’i CVTL  komesa inisiu to'o agora, ho estrutura sira hotu, voluntáriu sira nomós ba parseiru iha rai laran no doadór sira husi rai li'ur ne'ebé fó apoiu ba CVTL hodi hala'o nia atividade hakman sofrementu komunidade nian.

“Ha'u fiar, ha'u fó konfiansa tomak ba CVTL ninian, liliu ba joven voluntáriu sira ne'ebé mak servisu iha ne'e, katak sira-nia servisu ida ne'e sei la'o di'ak liu hodi fó apoiu ba ita-nia komunidade sira no ha'u fiar, ha'u fó konfiansa tomak ba sira-nia serbisu”, deklara nia.

Entretantu Prezidente Cruz Vermelha de Timor-Leste (CVTL), Madalena Hanjam hatete, haree ba tema CVTL ne'ebé iha katak hakman sofrementu umanu no CVTL nia istória hahú kedas iha tinan 1975 hala'o nia serbisu konflitu iha funu.

“Situasaun komesa avansa to'o tama iha Indonézia nia tempu, Cruz Vermelha la'o hamutuk  ho Indonézia depois to'o ita independensia ita hari’i ita-nian rasik, agora 21 anos no kontinua hala'o nia servisu umanitária ba família ne'ebé mukit liu, siknifika ema ne'ebé ki’ak liu no fulneravel liu”, dehan nia

Enkuantu haree ba situasaun dezenvolvimentu governu hala'o no CVTL sai hanesan ausidiu  ba  governu maibé kuandu iha lakuna nia tama kedan, ezemplu ajuda iha inundasaun, emerjénsia nune'e dentru tama iha oras tolu nia laran  nia atividade tenke la'o kedan.

“Atividade barak tebtebes ho volunmtáriu profesionál iha atividade jerál hanesan, halo uma, dada bee, fó asisténsia médika, fó asisténsia enfermajen, nutrisaun no atividade seluk tan", afirma nia.

Nune'e membru husi CVTL hamutuk rihun-rua-resin, voluntáriu rihun-neen, ema ne'ebé servisu atusrua no nia vor ba desizaun 21. (*)