Ministeriu Edukasaun Juventude no Desportu (MEJD), Armindo Maia apresia PLAN Internasionál ne'ebé apoiu matérial ijeni ninia hanesan sabaun lifeboy, hand sanitizer, bayklin, fixal ba MEJD,no MEJD mak  bele hatutan fila fali ba eskola sira.

“Ami hatene katak plan internasionál durante ne'e apoiu lubuk ida ona agora dadaun sei apoia tan ba esola iha Munisípiu Aileu no Ainaru, ami-nia obrigadu wain ba ita-boot sira suporta no apoiu tomak, mai ita hamutuk fó liman ba malu nafatin hodi luta hasoru pandemia Covid-19 ne'ebé estraga ita-nia edukasaun, saúde, vida no ekonomia”, dehan Ministru Armindo Maia, iha salaun MEJD Vila Verde, tersa (22/06).

Tanba ne’e hanesan manifestasaun ispirasaun husi servisu hamutuk koopersaun entre MEJD hamutuk ho organizasaun Naun governamentál sira, ajénsia internasionál lubuk ida, inklui United Nations Children's Fund (UNICEF), servisu hamutuk hodi bele prevene komúnidade edukativu sira, liliu iha ambiente eskola nia laran.

Iha fatin hanesan Diretora PLAN Internasionál, Diliana Ximenes hatete, sasán ne'ebé apoiu hodi suporta eskola hamutuk atusida-sianulu-resin-lima, husi pre-eskolar to’o ensinu sekundária no kada eskola sei hetan sabaun 30, fixal 2, bayklin 2.

“Iha Munisípiu Ainaru eskola hamutuk 98, iha Aileu eskola hamutuk 97, ne'e ami fó kadan eskola bayklin 2, fixal 2, no sabaun lifeboy 30”, hatete nia.

Entretantu PLAN Internasionál apoiu mós matéria konstrusaun bázika, hanesan pregu ba eskola sira ne'ebé estragu husi anin boot no sira entrega ba Ministériu Edukasaun hafoin fahe ba Munisípiu sira seluk ne'ebé eskola hetan estragu. (*)