Tanba, servisu inspesaun MTKI ne’ebé halo iha loron kinta (17/06) ba loja sira iha Dili, konsege deteta loja balu ho folin ne’ebé sa’e, maske iha balu folin sa’e ba pursentu sanulu-resin.
“Ministériu observa iha terenu katak, iha duni presu ba materiál konstrusaun iha distributór balun presu sa'e ho máximu 45,5% maibé iha mós distributór sira seluk nia folin sa'e pursentu 15”, dehan Ministru Turizmu Komersiál Industria, José Lucas do Carmo da Silva liuhusi iha kna’ar fatin Bebora, sesta (18/06).
Ba sasán ne’ebé foli sa’e kategória ba materiál konstrusaun nian maibé la'ós sasan hothotu folin sa'e. Tanba iha materiál balu ho folin sei nafatin tuir kategória presu ne’ebé Governu fó sai.
Entretantu, kona-ba bens ezensiál hanesan foos, mina, bebida no seluk tan sa'e porvolta pursentu hitu (7%) to'o 10%.
Iha mós razaun balu husi loza na'in sira fó hatene katak, husi nasaun orijen sasán nia folin sa'e no sasán tama mai Timor ne'e ladun tama tanba ró ladun halo operasaun masi Timor-Leste.
“Ho razaun sira ne'e Ministru mós fó hatene ba jestór sira atu koopera ho Governu iha situasaun pandemia Covid-19 ne'e iha situasaun difísil, atu nafatin mantein ho presu ne'ebé Governu fó sai ona, ho nune'e ita sei ajuda tebes ita-nia komunidade iha situasaun ne'e”, dehan nia.
Ba kompaña distributor ne’ebé sei hasa'e folin sasán, regra no regulamentu propriu atu parseiru hotu halo tuir regra hodi foó presu ne'ebé Governu fó sai.
Iha fatin hanesan, Diretór Nasionál Regulansaun Komersiál no Protesaun Konsumidór, Manuela da Silva Tilman hatete, servisu ne'e hamutuk ho Ministériu relevante sira, deteta kompaña balun ne'ebé iha nia presu sa'e, maibé balu presu normál nafatin.
“Ami deteta katak, balun sei iha presu estandar hela, bainhira presu aas oituan, ami sei pera ho ministériu relevante, ezemplu kuandu iha sansaun administrativu ruma diresaun nasionál regulasaun ministériu komérsiu industria sei rekomenda ba Autoridade Inspesaun no Fiskalizasaun Atividade Ekonómika, Sanitária no Alimentar, I.P. (AIFAESA) hodi foti medida maibé bainhira kazu ne'e tama ona krime ba manipulasaun ruma sei rekomenda ba parte Polísia Nasionál Sientífiku Investigasaun Kriminal (PNSIK) hodi haree medida ida ne'e”, afirma nia.
Relasiona ho kompaña ne'ebé indentifika hasa’e folin sasán, ekipa MTKI la bele fó hatene naran maibé ba futuru sira sei nafatin kontrola kona-ba ai-hán. (*)
