“Ami halo kna'ar hodi identifika no haree sira ne'ebé deside-an hodi envolve iha krime hanesan kontra bandu, falsifika valór merkadoria hodi la tuir prosedimentu kódigu aduaneira nian”, dehan Adjuntu Komisáriu Alfándega, José Abílio Afonso, iha salaun MF Ai-tarak Laran, tersa (18/05).
Haree ba hahalok sira ne’e, autoridade aduaneira halo parseiria ho USAID hodi dezenvolve liña direta Alfándega nian hodi kombate krime sira ligadu ho falsifikasaun valór merkadória nian.
Tanba ne'e, husu ba públiku bainhira hetan informasaun ruma kona-ba kríme Aduaneira, bele kontaktu direta ba númeru 12200 ho gratuitu iha oras 24 nia laran, durante semana ida, ka prinxe formuláriu relatóriu Online nian iha liña direta Alfándega liuhusi sira nia Website.
Embaixadora EUA iha TL, Kevin Blackstone reforsa, sira-nia esforsu hodi ajuda TL, ida mak halo prevensaun ba korupsaun no haforsa governasaun di'ak.
“Liña kontaktu “hotline" foun ne'e sei permite públiku hodi halo sira nia parte ba hare krime ne'ebé iha, hodi informa informasaun livre, seguru no segredu ba autoridade duaneira”, hatete Embaixadór Kevin.
Entretantu, projetu lansamentu liña kontaktu direta hodi kombate kríme aduaneira ne'e, apoiu orsamentu ho valór rihun US$8.8, husi EUA liuhusi USAID nia programa "Reforma Aduaneira" iha TL. (*)
