“Ha’u apresia tebtebes ho timoroan sira ne’ebé servisu iha Austrália tanba ita manan buat boot ida iha to’os na’in sira nia laran”, Inés de Almeida hateten ba www.tempotimor .com via telefónika, Segunda (30/11).
Nia dehan, uluk hahú ho ema oitoan de’it, maibé agora TL konsege tama ona to’o númeru três tanba toos na’in sira gosta los timoroan sira, entaun sira mak sai embaixadores ba Timor Leste.
Nia relata katak, oras ne’e daudaun iha nasaun lubuk ida mak haruka sira nia ema mai servisu iha Austrália liuhusi programa SWP no oras ne’e primeiru mak Vanuatu tanba sira iha ema 7.000, segundu mak maka Tongga ho traballador hamutk 3.000, no terseiru kedan maka Timor Leste ho traballador hamutuk 1.000.
“Bainhira ha’u ba ko’alia ho toos na’in sira, toos na’in sira husu katak ami hakarak mak Timor oan”, nia informa.
Tanba ne’e embaixadora ne’e hatutan, sira husi Darwin entrega tiha ona karta ba embaixada katak iha tinan oin sira presija timoroan hamutuk na’in 150 atu mai kuu pateka iha fulan Marsu.
“Tanba ne’e mak ami ko’alia ona ho governu Norten Territory atu bele hare oinsa mak ita bele lori ita nia ema sira mai servisu iha Austrália”, diplomata ne’e haktuir.
Embaixadora ne’e kontente tanba timoroan sira nia reputasaun diak tebtebes iha servisu fatin, maski iha ida rua mak nakar, maibé nia dehan, maior parte halo TL orgullu tanba mai servisu hatudu sira nia prestasaun diak tebes no balun mai iha Austr’alia dala sanulu tiha ona. (*)
PUBLISIDADE