Sekretáriu Estadu Kooperativa (SEKoop), Elizário Ferreira esplika, objetivu husi akordu ne'ebé asina ona entre SEKoop no Peace Corps atu oferese ninia voluntáriu sira hodi servisu ba komunidade liu husi kooperativa.
Elizário dehan, Peace Corps hanesan ajénsia ida husi povu Amérika ne'ebé oferese ninia matenek nain sira atu servisu voluntáriu ho kooperativa sira, eduka ita nia povu atu hatene produz produtu sira bele iha kuantidade, kualidade no eduka komunidade sira bele hala'ó vída negósiu ho sustentável no inklui lori sira ba to'o merkadu.
“Alende ne'e, la'ós de'it ba vida negósiu, maibé iha mós vida sosiál no ekonómiku sira seluk ne'ebé maka parte rua sei servisu hamutuk atu tulun ita nia povu atu hatene kona-ba oinsá maka atu sai sidadaun ida ne'ebé bele kontribui ba bem-estar sosiedade nian, ekonómia no estabilidade iha ita nia rai laran”, hatete Sekretáriu Estadu Kooperativa (SEKoop), Elizário Ferreira, hafoin asina MoU ho Peace Corps iha Akait, kuarte (23/09).
Governante ne'e dehan, durante ne'e iha ajensia barak maka iha interese atu ba submete sira nia proposta SEKoop, iha proposta balu balu ekipa sira sei tetu hela, balu sei lee hela sira nia dokumentu, maibé, haree ida ne'ebé maka prioridade no prontu ona, hafoin SEKoop bele hahú ona ho asinatura, no ba futuru SEKoop sei halo mós memorandu ho instituisaun sira ne'ebé atu kontribui ba sosiedade nia diak.
“Iha ida ne'e la'ós atu husu osan ba malu, maibé oinsá mak atu bele servisu hamutuk atu bele eduka. Entaun, sira neebé mai ho sira nia esperiensia husi sira nia rain rasik, ne'ebé iha esperiénsia diak kona-ba dezenvolvimentu kooperativa nian”, dehan nia.
Kona-ba atu halo destakamentu ba voluntáriu sira, nia dehan, bazeia nesesidade komunidade nian nomós ezijénsia kooperativa nian, no destakamentu sei haree fatin ne'ebé eziste kooperativa karik sente sei fraku iha kontabilidade, oinsá atu halo promosaun, ida ne'e mak sei fó prioridade ba.
“Sira ne'ebé dezenvolvidu ona, la presiza tanba ita iha kooperativa besik 200, ema 80 ne'e signifika ita fó prioridade ba sira ne'ebé maka sei hakdasak, maibé kooperativa ne'e iha territóriu tomak”, hatete nia.
Nia dehan, Amerika sai hanesan nasaun ida ne'ebé maka ninia membru kooperativa kuaze 87 milloens abitantes mak hola parte iha kooperativa rua hanesan Kooperativa Produtivu iha membru hamutuk 30 mill resin de'it, no membru maioria mak iha hola parte iha kooperativa Kredit Union.
Nia espera, ho esperiénsia ne'ebé ajénsia Peace Corps iha, nia voluntáriu sira bele mai para atu bele servisu hamutuk ho SEKoop hodi bele eduka liu tan nia povu oinsá mak bele moris iha vida organizasaun atu nune'e bele hakbi'it tan iha kapitál finanseira hodi produz no oferese ba iha merkadu.
Reprezentante Peace Corps iha Timor-Lesre, Kavita Pullapilly hatutan, programa Corpo da Paz nian iha TL iha rua, maibé programa ne'ebé sira servisu besik liu ho SEKoop maka sira hanaran programa dezenvolvimentu ekonómiku komunitária.
Nia dehan, durante ne'e Corpo da Paz nia membru voluntáriu sira servisu hamtuk ona ho komunidade sira husi grupu oioin inklui kooperativas sira iha komunidade hodi haree liu ba oinsá atu hasa'e produsaun ka hadia komunidade sira nia negósiu, haree kona-ba kualidade uma iha sira nia prosesu dezenvolvimentu, haree kona-ba kontabilidade, karik iha buat ruma ne'ebé Corpo da Paz presiza hadi'a no fó tulun.
“Ami nia voluntariu moris iha baze, sira moris duni iha komunidade nia leet no servisu ho sira iha ne'ebá. Nee duni sira bele responde liu ba saida maka komunidade nia hakarak, presiza, tanba komunidade ida ba ida nia presiza la hanesan. Ne'e duni sira moris iha neebá para halo servisu sira hanesan ne'e” dehan Kavita Pullapilly.
Nia hatutan, jerálmente servisu ne'ebé voluntáriu sira halo iha komunidade, iha tendensia liu para atu sustentável, tanba sira moris ho hamutuk komunidade hodi halo tuir lala'ok tomak iha komunidade, tanba ne'e maka atividade ne'ebé sira halo ba komunidade iha kontinuasaun.
“Normalmente, iha tinan ida, ami iha voluntáriu hamutuk ema nain 40 ba programa iha dezenvolvimentu ekonómiku komunitáriu nian, iha programa edukasaun nian mós hamutuk 40 pesoas, nune'e totál voluntáriu sira hamutuk 80 pesoas mak sei hamutuk ho SEKoop hodi tulun komunidade sira”, dehan nia.
Nia informa, dadaun ne'e, munisípiu 4 hanesan Kovalima, Vikeke, Lautem no Oekusi mak sira seidauk iha membru ba voluntáriu, maibé munisípiu 9 seluk maiória Corpo da Paz nia voluntáriu eziste hotu no hala'o servisu ona hamutuk ona ho komunidade sira iha baze.
Entretantu, akordu kooperasaun ne'e rasik halo ba tinan lima, no bele renova fila-fali konforme servisu ne'ebé mak iha tuir nesesidade ne'ebé membru kooperativa sira iha.
