Tempotimor (Dili) - Orsamentu Jerál Estadu (OJE) ba tinan 2021 nian parte Sekretária Estadu Kooperativa (SEKoop) hetan montante orsamentu hamutuk tokon US$ 7.8 no laiha tan pedidu adisionál.

Sekretáriu Estadu, Elizário Ferreira hatete, SEKoop la halo tan proposta adisionál tanba, valór orsamentu ne'e rasik sufisiente ona, no bainhira kompara ho OJE 2020 nian la konsege to'o tokon US$ 4, maibé agora atinje to'o tokon US$ 7.8.

Nia konsidera, ho montante OJE 2021 ne'ebé sufisiente liu, ida ne'e mós hanesan teste ida ba SEKoop atu bele halo planu ka ezekuta duni ida ne'e ka lae, tanba ne'e sira prontu atu servisu hodi hala'o servisu ne'ebé kontribui ba atividade produtivu sosiedade ninian.

“SEKoop laiha adisionál, Sekoop simu tomak desizaun mai husi governu hamutuk tokon US$ 7.8", hatete Elizário Ferreira, iha Akait, Kinta (24/09).

Nia hatutan, husi orsamentu tokon US$ 7.8 ne'ebé iha rihun US$ 600 sei koloka ba saláriu vensimentu, bens no servisu hamutuk tokon US$ 2.4 no restante ne'e nia baze orsamentu hamutuk tokon US$.4.5 sei aloka ba transferensia públika.

Iha transferensia públika ne'e hamutuk tokon US$.3.5 ne'e sei ba liu rekuperasaun ekonómiku hodi aloka ba iha kooperativa kréditu sira atu fasilita kréditu ba membru sira kooperativa nian ho 2% kada tinan ba jurus.

"Husi 2% neee atu bele absorve ba kooperativa hotu ne'ebé hamahan aan iha federasaun kooperativa kréditu Hanai-Malu. Kooperativa fó kréditu ba ami nia membru sira ne’e ho 4% kada tinan. Signifika 4% nee dividi ba 12 ne’e 0.3%", dehan nia.

Nia fó ezemplu katak, karik ema ida deve US$ 1.000 iha kooperativa, ne'e nia só selu jurus ne'e US$.3kada fulan, signifika ida ne'e ki'ik liu ona entre sira ne'e hotu, tanba kooperativa mosu ho ninia kritériu rasik, ho ninia edukasaun sira rasik ne'ebé la depende ba kapitál ne'ebé membru sira rasik iha, maibé depende ba vontade ho karater di'ak ne'ebé nia rasik iha.

"Katak nia deve osan US$1000, atu halo atividade produtivu no nia promete katak nia sei devolve. Ida ne'e maka atu bele hala'o, atu nune'e bele kontribui ba asegura sustentábilidade husi rekuperasaun ekonómika ne'e ninian", dehan nia.

Entretantu totál kooperativa ne'ebé oras ne'e SEKoop rejista iha baze dadus hamtuk 214 mak eziste iha territóriu TL. (*)