Simbul simu ho lisan ne’e sai ona hanesan kultura husi komunidade Mausiga ba bainaka ne'ebé vizita iha fatin refere.
Nune'e bainhira Sekretáriu Estadu Elizário to'o iha fatin grupu Buka Fini ba Futuru iha aldeia Manu-Sahe, lia nain husi Uma lisan Ustiul Manu-Sahe simu ho bidu no lian dadolin hanesan parte simbul benvidu ba bainaka.
"Hanesan Sentidu respeito ho haksolok, tenki simu ho haklosok no labele oin buis, ne'e hatudu Kultura no ami iha ne'e senti kontenti tanba babain ami mesak, ohin bainaka espesial ida mai," dehan Agrikultor Francisco Alves de Araújo bainhira partisipa prezensa Sekretáriu estadu kooperativa Elizário Ferreira iha Manu-sahe, Suku Mausiga Postu admistrativu Hatubuiliku Munisipiu Ainaro, Sabdu (19/9).
Iha fatin hanesan Sekretáriu estadu kooperativa Elizário Ferreira hateten agradese ba Komunidade no lian nain sira iha Mausiga ne'ebé simu ho Kultura, no Elizário prontu atu fasilita formasaun no merkadu ba grupu no agrikultura sira iha Mausiga.
"Obrigado ba imi nia lian hamulak," dehan Elizário.
Aldeia Manu-Sahe suku Mausiga rasik maioria moris ho vida agrikultor, produtu ne'ebé komunidade sira iha mak hanesan Fehuk ropa, cafe, batar, fore keli, koto no seluk tan.
Entertantu SeKoop nia vizita ba grupu agrikultura Buka Fini ba Futuru iha aldeia Manu-Sahe atu hare'e dereitamente kondisaun inklui produtu husi agrikutor.
Husi vizita ne'e mos, SeKoop fahe informasaun relasiona ho programa inportante liuliu kona ba oinsa atu agrikultor sira hamutuk iha grupu koperativa ida nune'e fasil atu dezenvolve aan, bele asesu fundu no halibur produtu hodi lori ba merkadu.
