Estatutu ne’ebé halo ona revizaun ba lei ne’ebé regula CCI-TL ne’ebé seidauk hetan aprovasaun husi Asembleia Jeral husi kongresista sira.

"Iha loron hirak liubá ami konsege halo revizaun ho komisaun delegasaun ba revizaun lei ne’e no ohin ami entrega ofesialmente ba prezidente eleitu CCI-TL Oscar Lima”, tenik Prezidente Asembleia Jeral, Paulo Amaral, iha salaun konferensia CCI-TL, Akait-Dili, Segunga (8/4/).

Lei ne’ebé entrega ona ba prezidente CCI-TL ne’e atu prepara ho estuda no aprova iha kongresu liuhusi Asembleia Jeral.

Iha fatin hanesan, Prezidente CCI-TL, Oscar Lima, promote sei la’o tuir lei ne’ebé hakerek ona iha dokumentu ne'e.

"Buat sira ne’e hanesan mata-dalan ida hodi ita la’o tuir", tenik nia.

Lider CCI-TL ne’e dehan, iha estudu lei ne’e buat ruma ne'ebé presiza husi parte CCI-TL sei bolu parte Asembleia Jeral nian hodi koalia hamutuk no lori instituisaun too 2022.

Lei sira neebé hetan revizaun ne’e importante mak fó kompetensia ba Prezidente CCI-TL hodi ezekuta prosesu sira hotu iha periodu 2018 to’o 2022.