Ministru Agrikultura no Peska (MAP), Pedro dos Reis katak, akordu entre governu Timor-Leste ho ADB atu apoiu ba MAP para hasa'e produsaun kafé Timor no halo rekuperasaun ba ekonomia Timor-Leste.
"ADB apoiu tokon US$ 3 ba Ministériu Agrikultura no Peska, liuliu ba iha diresaun kafé hodi hasa'e kafé nia produsaun no kualidade para rekupera ekonomia liuliu ba kafé na'in sira," dehan nia, iha edifísiu Ministériu Finansas (MF), Ai-Tarak Laran, Segunda (13/7).
Nia hatutan, akordu ne'ebé governu TL halo ho ADB ne'e di'ak tanba bele apoiu TL tanba situasaun agora iha krize nia-laran.
Iha fatin hanesan, Ministru Finansas (MF), Fernando Hanjam liuhusi nia diskursu hateten, atividade akordu ne'e sei apoiu signifikante ba produsaun kafé iha TL.
"Projetu ne'e sei apoiu atividade importante atu hadi'a signifikamente iha setór kafé Timor Leste," dehan nia.
Akordu entre governu Timor-Leste ho ADB ne'e durante tinan haat nia laran, ne'ebé sei servisu diretamente husi Ministériu Agrikultura no Peskas (MAP) hamutuk ho asosiasaun kafé Timor Leste hodi toma médida importante para alkansa ba palanu dezenvolvimentu nasionál kafé, ne'ebé to'o 2030 sei hasa'e produsaun kafe signifikante ka valór esprotasaun kafé. (*)