"Apoiu ohin ne'e ba munisípiu neen, hanesan Ermera, Manufahi, Likisa, Aileu, Ainaru inklui Mantutu ho totál orsamentu tokon US$ 3 husi ADB, maibé osan ne'e nia hun mai husi governu Japaun," dehan reprezentante Country Director ADB, José Pereira, ba jornalista sira iha edifísiu Ministériu Finansas (MF), Ai-Tarak Laran, Segunda (13/7).

Nia afirma, akordu ohin ne'e atu apoiu tékniku ba Ministériu Agrikultura no Peska, liuliu iha dezenvolvimentu kafé nian.

"Orsamentu ne'ebé mai husi povu Japaun atu redús ba pobreza nian ne'ebé jere husi ADB," dehan José.

Nia mós afirma, apoiu ne'e ba faze dahuluk durante tinan 4 nia-laran.

"Apoiu ida ne'e iha faze primeiru iha intervensaun kafé nian, para lori haree see iha posibilidade para apoiu iha tinan oin mai," nia dehan.

Entretantu, apoiu ne'ebé ADB fó ba MAP liuliu área kafé nian mak oinsa atu halo moderniza agrikuktura kafé iha rai-laran.

"Maneira apoiu ne'e mak halo identifikasaun ba uma-ka'in sira ne'ebé durante ne'e depende ba kafé, depois agora ne'e sira la'o ho meneira tradisionál, entaun oinsa mak halo moderniza ba kafé no oinsá mak liga ba merkadu para ita-nia kafé nia kualidade ne'e bele kompete iha merkadu Internasionál," nia dehan.

Aleinde ne'e, ADB mós apoiu ona asisténsia tékniku iha área seluk kona-ba planu setór kafé nian iha tinan 11 mai. (*)