PR Lú-Olo Rekoñese Povu Kbiit Laek Falta Aihan

Prezidente da Republika, Dr. Francisco Guterres Lu Olo hato'o mensajen ba nasaun relasiona ho estensaun EE ba datoluk (28/5) Prezidente da Republika, Dr. Francisco Guterres Lu Olo hato'o mensajen ba nasaun relasiona ho estensaun EE ba datoluk (28/5) Foto Midia PR

Tempotimor (Dili)-Prezidente Repúblika Francisco Guterres Lu Olo rekoñese durante implementasaun estadu emerjénsia komunidade kbiit laek sira barak mak hasoru problema falta aihan.

PR Lu Olo liu husi ninia deklarasaun ba estensaun estadu emerjensia (EE) faze datoluk hatete, mosu pergunta kona-ba atu hakotu EE ka lae, tanba iha TL laiha ona Covid-19.

Ba pergunta ne’e, Lu Olo dehan, mosu reasaun oioin tanba Timor-oan sira, liu-liu sira ne’ebé moris ho negosiu kiik labele hala’o sira-nia atividade normal hodi sustenta an no sustenta sira-nia familia.

"Loos duni katak iha fulan rua nia Iaran, negosiante barak, liu-liu negosiante ki'ik sira, hapara ka hamenus sira-nia atividade fila Iiman,” dehan PR Lu Olo iha palasiu prezidensial Nicolau Lobato, Bairo-pite, Kinta (28/05).

Maske nune’e, Xefe Estadu ne’e dehan, iha tempu susar ne’e, espiritu solidariedade sa'e maka’as husi emprezériu sira, organizasaun sosiedade sivil, konfisaun relijioza no ema ida-idak, ho insiativa rasik, fó tulun ba malu.

PR Lu Olo dehan, durante EE ajénsia nasionál no internasionál sira mós fó ajuda oioin ba komunidade, enkuantu governu prepara hela pakote rekoperasaun ekonomiku.

"Ajuda sira ne’e akontese enkuantu governu prepara mós pakote ekonomiku hodi ajuda uma-kain kbiit-laek no apoia empreza privadu atu traballadór sira labele lakon empregu ka hatún saláriu," nia dehan.

Maske nune’e, PR Lu Olo rekoñese katak apoiu governu nian seidauk to'o iha povu sira tanba hasoru dezafiu balun.

"Ha'u hatene katak apoiu husi governu la to’o Ialais no kedas ba populasaun no ba empreza sira. Situasaun ida ne’e hamosu krítika oioin. Ha’u hein katak governu aserta ona dadus no bele ona hato’o apoiu, liu-liu ba ita-nia ema vulnerável sira, iha tempu badak," PR Lu Olo hein.

 

VIDEO PUBLISIDADE APELU HUSI PM TAUR APLAUS BA FRONT LINE

Rate this item
(0 votes)
Last modified on Friday, 29 May 2020 12:12
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.