“Kolegas no belun sira iha ha’u-nia mandatu tinan-lima, ita hasoru impase polítiku oioin, hahú kedas husi formasaun VII Governu Konstitusionál to’o VIII Governu Konstitusionál. Ita hasoru problema oioin tanba inundasaun iha 2020 no 2021 no pandemia Covid-19”, dehan nia hafoin atribui medalla grau kolar no sertifikadu apresiasaun ba funsionáriu públiku no kontratadu inklui traballadór, iha Palásiu Nobre Lahane, kuarta (18/05).

Maske ho dezafiu hirak ne'e, maibé nu’udar Prezidente Repúblika sempre halo esforsu liuhusi diálogu ho órgaun Estadu nian no husi organizasaun nasionál no internasionál oioin, no ajuda husi kooperasaun bilaterál no multilaterál nomós partisipasaun povu tomak nian, konsege hakat impase polítiku no difikuldade umanitária.

Tanba ne'e, nuu’dar aman ba nasaun hakarak rekoñese koñesimentu no esperiénsia kona-ba asuntu polítiku ho jurídiku nomós kona-ba administrasaun no finansa hato’o husi funsionáriu no kolaboradór sira mak fó kb’iit ba Prezidente Repúblika atu foti desizaun ba Estadu no Nasaun Timor-Leste nia di’ak.

Iha ne'e, Prezidente Repúblika nafatin apela ba servidór Estadu ida-idak atu kontinua hakbi’it-an nafatin ho étika profisionál hodi servi Estadu no Povu ho kapasidade tomak ne’ebé sira iha.

‘Maluk funsionáriu públiku no kolaboradór sira hotu atu hakaat ba oin nu’udar servidór ida, iha instituisaun públika ka privada, prosesu aprendizájen nunka hotu iha ita-nia moris tomak”, dehan nia.

Ho koñesimentu ema nian evolui husi tempu ba tempu, atu hatán ba nesesidade organizasaun ida nian hodi servi di’ak liután, no servidór ida-idak la’ós de’it kumpre ninia dever ho eselénsia maibé nu’udar sidadaun Timor-Leste, tenke haka’as-an atu prodús mós koñesimentu no hahalok foun ba instituisaun, komunidade no País. 

Maske tempu la hapara atu aprende beibeik no hatutan ba kompatriota sira seluk ka ba umanidade tomak, maibé bainhira sei moris tenke kontinua aprende.

Iha ne'e, Prezidente Repúblika mós fiar ekipa ne’ebé mai hamutuk ho prezidénsia iha 20 maiu 2017 no kontrata ikus mai, liuhusi nomeasaun polítika, sei husik legadu di’ak ida ba Prezidénsia Repúblika tuir mai, atu hatutan ka hadi’ak kna’ar institusionál sira.

Husu nafatin atu aprende ba beibeik, tanba prosesu aprendijazen ne'e la siknifika ema ida tenke mai hanorin, maibé ida-idak bele haka’as-an ho vontade rasik atu aprende husi serbisu ne’ebé nia halo no bele aprende husi sira seluk iha serbisu loroloron nian. (*)