Tuir informasaun ne’ebé www.tempotimor.com, asesu iha pájina AIFAESA, segunda (21/08/2023) katak, ekipa operasionál ne’ebé halo inspesaun iha Munisípiu Bobonaro, kompostu husi Departamentu Operasaun no Departamentu Metrolojia Padronizasaun ba Postu Administrativu tolu hanesan, Postu Lolotoe, Bobonaro no Maliana Vila. Nune’e kontinua halo inspesaun iha Postu Maliana Vila nu’udar loron ikus ba atividade operasionál tuir planu asaun anual trimestre datoluk nian.
Prezensa AIFAESA nian durante semana ida iha Bobonaro, konsege inspesiona estabelesimentu hamutuk Atus Ida, Limanulu-resin-ne’en (156). Husi totál refere ekipa prosesa loja balun ne’ebé fa’an produtu liu prazu no tabaku ilegal, bazeia ba lejislasaun sira ne’ebé regula kona-bá atividade negósiu.
Hafoin halo kontrolu ba estabelesimentu, ekipa halo kedas destroisaun ba produtu alimentár liu prazu no sigaru ilegál sira, ne’ebé lidera husi Xefe Seksaun Metrolojia, Julito B.S. Gomes, no hetan partisipasaun husi PNTL hahú husi prosesu inspesaun to’o destroisaun. (*)
