Tanba dalan ne’ebé ekipa IJE ho mákina pezadu atu ba normaliza mota ne’e, liu fali husi natar laran, entaun komunidade balun la konkorda, maibé ekipa sira sei buka hela meius atu rezolve.
"Mákina balun lori ona mai estasiona iha ne'e, atu hahú servisu, bainhira sira hahú servisu iha difikuldade oituan kona-ba ema nia natar, ema la fó dalan, tanba dalan ne'e bá ami importante, haree iha mota Laklo sé ami lori kombustível ne'e susar boot, ami la’os la halo la'e, ami prontu atu halo", dehan Reprezentante Institutu Jestaun no Ekipamentu, Egas Correia Lemos liuhusi komunikadu imprensa ne'ebé fo sai husi Gabinete Prezidente Repúblika, sábadu (10/12).
Dadaun hasoru difikuldade, tanba la iha astrada atu destaka ekipamentu pezadu no entidade sira ne’e buka hela meius atu rezolve, tanba udan mos tun dadauk ona.
Antes ne’e, iha loron segunda Prezidente Repúblika, José Ramos-Horta bolu ona Ministru Obras Públika, Abel Pires no Prezidente IJE hodi deskute kona-ba normalizasaun mota Laklo no ida seluk iha Aldeia Ilihuli, Suku Iliheu ne'ebé estraga hotu komunidade nia to'os no natar.
Kestaun ne’e, ekipa husi Prezidénsia Repúblika, ne'ebe lidera husi Julio Gonçalves hamutuk ho asesor prinsipál Tomás do Rosário Cabral halo akompañamentu ba Reprezentante Ekipamentu Institutu Públiku (IJE.ip) buka hela meius atu normliza mota iha Postu Administrativu Laklo, Munisípiu Manatutu.
"Hanesan enkontru semana-rua liuba katak, ekipa IJE mai ona halo "site visit", ita mai hamutuk ho ekipa IJE nian hodi haree atu bele ajuda normaliza fali, atu bee irigasaun bele la'o di'ak, komunidade sira bele halo fali natar atu komunidade sira nafatin iha ai-han", dehan Xefe ekipa Júlio Gonçalves.
Xefe Suku Laicore, Postu Administrativu Laclo, Munisípiu Manatutu, Zeltino Tino do Rosário Cárcerres, husu Prezidente Repúblika, José Ramos-Horta atu reforsa no mantein komunikasaun ho IJE, nune'e normaliza lalais mota Laklo.
"Husu ba Prezidente Repúblika bele reforsa nafatin bá IJE para normaliza mota ne'ebé sobu komunidade sira-nia natar, tanba durante tinan rua ona sira la halai natar no menus ai-han", nia husu.
Autoridade lokál mos hato'o ona pedidu bá Administradór Munisípiu hodi husu IJE atu halo intervensaun lalais hodi labele estraga irigasaun ne'ebé kanaliza bee bá komunidade sira-nia natar, maibé eskavadór rua de'it ida avaria la konsege normaliza ikus mai bee sobu sira-nia natar kuaze ektare 150.
Tuir dadus ne'ebé iha, natar ne'ebé hetan estragus husi kalamidade públika 4 fulan-abríl tinan 2020 ne'e, hamutuk ektar 9.000, ne’ebé kompostu husi ekatre 3.500 iha Postu Administrativu Laklo no ektare 1.500 husi suku Iliheu bairo Rembor inklui ektare 400 husi Postu Administrativu Manatutu Villa ho Obratu. (*)
