Prezidente Asosiasaun Vendedór Munisípiu Baukau, Daníel Soares dos Santos, promete sei lori aspirasaun vendedór sira nian ba Governu atu regula Lei merkadória lolos entre vendedór Timoroan ho estránjeiru.
"Ami hakarak uza Asosiasaun ida ne'e hodi liga ba Governu produs Lei ruma atu proteje ba ita", dehan nia hafoin simu tomada de pose iha salaun Sentru Konvensões Villa Antiga Baukau, Tersa (13/13).
Daníel kompara, iha tinan-1959 akontese iha nasaun viziñu Indonesia mós akontese merkadu livre, maibé iha regulamentu, tanba simu inisiativa husi entidade hotu.
Enkuantu iha Timor-Leste (TL) konsidera lei merkadu nian laloos, tanba Governu fó lisénsa arbiru ba sidadaun estranjéiru sira hodi loke keos to'o iha nivél Munisípiu.
"Agora ne'e Governu halo sabraut, tanba sira fó lisénsa arbiru, ema mai tama laiha regulamentu ida sira mai fa'an besi, suprami hanesan mós ho ami, oinsá ita bele moris", nia argumenta
Nune'e liuhusi harii asosiasaun nu’undar dalan di'ak atu hasoru Governu haree ba lei merkadu livre.
Tanba, dala barak fó protestu liuhusi konferénsia imprensa hodi kestiona lei merkadu livre nian, maibé laiha atensaun husi Goveru no konsidera protestu hotu hanesan ilegál.
"Agora ne'e legál ami sei ezije, ami Baukau sei sai ezemplu ba Munisípiu seluk halo ida ne'e", nia hatete
Husu Govrernu atu atensaun ba lei merkadu livre, nune'e sidadaun estránjeiru iha Timor labele fa'an sasan hanesan ho sidadaun Timoroan, tanba hirak ne'e la regula mak akontese dadaun joven Timoroan barak buka moris iha rai liur, tanba iha Timor labele halo kompetisaun ho estránjeiru. (*)
