Tuir informasaun ne’ebé www.tempotimor.com, asesu iha pájina BTL,EP, domingu (31/07) katak, Diretór D.O.M BTL,E.P, João N. Piedade Bras, hamutuk ho Koordenadór BTL,E.P munisípiu Ainaro, Germano de Araujo no mós Ofisiál Apoiu Kliente BTL,E.P, João Paulo da Silva Cardoso, hala’o Sosializasaun kona-ba Dekretu-lei númeru 41/2020 de 25 de Setembro, Dekretu-lei númeru 4/2004 de 11 Fevereiro, Diploma Ministeriál númeru 1/2004 de 11 Fevereiro nomós  Diploma Ministeriál númeru 1/2009 de 5 Outubro.

Sosializasaun ida-ne’e rasik loke husi Sekretáriu Administrasaun Munisipiu Ainaro, José de Araújo no realiza iha Salaun enkontru Edifisiu Administrasaun Munisípiu Ainaro.

Sekretáriu Administrasaun Munisípiu Ainaro, José hatete, atividade ne’e importante, komunidade atu rona direta husi BTL Nasionál no BTL munisípiu Ainaro ninian ligadu ho utilizasaun bee.

Tanba ne’e husu ba partisipante sira iha sosializasaun ne’e katak, karik iha duvidas ruma, bele hato’o iha momentu ne’e, atu nune’e bele hamutuk buka solusaun.

Entertantu Diretór D.O.M BTL,E.P, João Bras hatete, objetivu prinsipál husi sosializasaun ne’e atu partilla selu bee-moos no poupa bee-moos, importante mak tuir regra no prosidementu ne’ebé mak vigora ona iha lei.

Ho ida-ne’e, sosializa bazeia ba lei anterior númeru 4/2004 ko’alia kona-ba fahe bee ba ema hotu, segundu ko’alia kona-ba lei númeru 1/2009  kona-ba tarifaria nian, iha mós lei ko'alia kona-ba fiskalizasaun, ida-ne’e integradu no Diretór ne’e haktuir katak tenke esplika didi’ak ba konsumedór sira para sira bele hatene di’ak liu, nune’e ikus kontribui taxa ba Estadu.

“sosializasaun nu’udar faze ida ne’ebé di’ak atu inan-aman sira intende, laiha duvida tan iha fitiri, tanba se la mai halo sosializasaun depois ita obriga ita-nia inan-aman sira selu, ne’e sei iha duvidade, entaun objetivu prinsipál mak ida-ne’e, sosaliza lei ba sira para sira hatene dia’k liu, iha futuru laiha tan pergunda ruma ba BTL”, dehan Diretór João.

Tanba tékniku BTL,E.P sira ne’ebé maka destaka iha munisípiu Ainaro, sira prontu atu halo servisu, tékniku ba ema hothotu ne’ebé iha munisípiu,l iliu iha área urbana tenke asesu bee, pelumenus komunidade hothotu asesu.

Daudaun ne’e, BTL,E.P hahú ona instalasaun metru kontadór fazeadamente, ba munisípiu Ainaro liuhusi Koordenadór BTL,E.P Munisípiu Ainaro, hasai ona sirkular ida ba sira ne’ebé mak seidauk tau mentru kontadór, selu tuir sirkulasaun ne’ebé hasai tiha ona liuhusi Prezidente Autoridade nian para inan-aman sira selu tuir tarifa ka kustu bazeia ba sirkulasaun maibé kuandu tau ona metru kontadór sei selu tuir metru kontadór.

“Iha fazeadamente BTL,EP sei esforsuy ho maneira sira para hothotu tenke tau instalasaun metru kontadór iha tempu badak, no laiha razaun, bee ne’ebé laiha sira sei esforsu para dada bee to’o iha uma”, afirma Diretór D.OM.

Enkuantu iha kapitál Ainaro dadauniha metru kontadór ne’ebé instala uluk atusida-resin tuir mai bazeia ba pedidu ne’ebé mak tama ona ba BTL,E.P nasionál husu besik rihun-rua-resin.

Durante sosializasaun ne’e, konsumedór sira hato’o mós sira-nia lamentasaun sira nomós sujestaun balun ba BTL,E.P, maioria husi partisipante sira ne’ebé mak marka prezensa iha Sosializasaun ida-ne’e hato’o katak sira prontu atu koopera ho BTL,E.P no prontu selu tarefaria bee-moos.

Maibé ho kondisaun ida katak BTL,E.P tenke hadi’a sistema distribuisaun bee ne’e rasik inklui tengki halo sosializasaun liután tama sai suku, aldeia no rurál hodi esplika di'ak liután kona-ba oinsá lee metru kontadór nune'e bele selu bee.

Partisipante sira iha Sosializasaun ne’e hanesan, líder Komunitária sira, PNTL munisípiu Ainaro, Funsionáriu sira balu husi Administrasaun munisípiu Ainaro, Mestra sira, Funsionáriu BTL,E.P munisípiu Ainaro, Veteranu nomós komunidade sira. (*)