Tuir informasaun ne’ebé www.tempotimor.com, asesu iha pájina MOP, kinta (21/07) katak, Ministru Obras Públikas (MOP), Abel Pires da Silva, partisipa iha reuniaun Konsellu Administrasaun Fundu Infraestrutura (KAFI) ne’ebé lidera husi Prezidente KAFI atuál Vise Primeiru Ministru no Ministru Planu no Ordenamentu (V-PM no MPO), José Reis, iha salaun ADN, Hudi-Laran, Dili.
Objetivu husi reuniaun KAFI ne’e hodi ajusta projetu Fundu Infraestrutura (FI) husi Ministériu Obras Públikas (MOP) rasik ba Orsamentu Jerál Estadu (OJE) tinan fiskál ba 2023 liliu iha área estrada no ponte, eletrisidade, bee no saneamentu, ne’ebé aprezenta husi Diretora Ezekutiva Sekretariadu Grande Projetu (SGP), Odete da Costa Vitor, ho ekipa.
Iha reuniaun ne’e Diretór Jerál Obras Públikas (DJOP), Rui Hernani, Prezidente Konsellu Administrasaun Eletrisidade Timor-Leste (EDTL.EP), Paulo da Silva, no Prezidente Konsellu Administrasaun Bee Timor-Leste (BTL.EP), Carlos Peloi dos Reis, partisipa hodi konfirma projetu sira ne’ebé planea ona ba 2023 ho nia orsamentu sira ne’ebé koloka iha FI antes hetan aprovasaun husi KAFI rasik.
Reuniaun ne’e partisipa mós husi Ministru Finansas (MF), Rui Augusto Gomes, Direitór Ajénsia Dezemvolvomentu Nasionál (ADN), Mariano Reinato Da Cruz, parte husi Komisaun Nasionál Aprovizionamentu, inkui tékniku sira. (*)