Xefe Suku Afaloikai, Jermano João Baptista, haktuir, udan boot ne'ebé akontese iha semana ba kotuk, kauza mota boot tun estraga uma hamutuk 15 no la konsege salva sasan sira seluk.

Uma iha Suku Afaloikai, husi Aldeia Okilari hamutuk 5, Aldeia Buibela 3, Aldeia Uaimata uma 4 no Aldeia Lena uma 2.

"Sira seidauk hetan apoiu ruma husi ita nia Governu," dehan nia, kuarta (20/07).

Husu governu atu fó apoiu emerjénsia ba família dezastre natural sira iha Suku Afaloikai, tanba balun lakon sasan uma laran hanesan bikan, kanuru, sanan no seluk tán.

Nune’e, Diretór servisu protesaun sivil Munisípiu Baukau, Nelson Nunes, hatete, stock sasan nesesidade bázika iha armazen Munisípal preparadu atu fó apoiu emerjénsia ba vítima dezastre natural, maibé laiha transporte atu transporta ba to'o iha vítima sira.

"Ita iha sasan atu apoiu, maibé difikulta transporte, ne'e mak ita nia vítima sira seidauk hetan apoiu emerjénsia," nia hatete

Maibé, nafatin tenta husu transporte ba diresaun seluk, atu fó apoiu emerjénsia ba vítima sira iha tempu besik.

Tanba, vítima ne'ebé servisu protesaun sivil Baukau rejistu kuaze seidauk hetan apoiu emerjénsia.

Entretantu vítima dezastre natural ne'ebé servisu protesaun sivil Baukau rejistu durante iha fulan-jullu tinan-2022, husi Postu Administrativu Baguai hamutuk 8, Baukau Vila 2, inklui Postu Venilale ida. (*)