Iha aprezentasaun ne’ebé halo husi Ministru Lucas do Carmo da Silva, hetan akomapaña husi Koordenadór-Jerál ba Espo Dubai tinan 2020, Manuel Vong, halo aprezentasaun ba Konsellu Ministrus kona-ba rezultadu partisipasaun Timor-Leste iha Espo Dubai tinan 2020.
“Pavillaun Timor-Leste, iha espozisaun mundiál dahuluk hala’o iha médiu oriente, ho vizitante liu ema rihun 340. hahú husi loron 1 fulan-outubru to’o loron 31 fulan-marsu tinan 2022”, dehan Ministru Prezidénsia Konsellu Ministru, Fidelis Leite Magalhães, iha Palásiu Governu, kuarta (13/07).
Durante períodu ne’e realiza ona asaun promosaun no marketing investimentu oioin iha Timor-Leste, iha área sira turizmu no ospitalidade, agrikultura no peska, konetividade, lojístika no transporte no petróleu, gás no minerál.
Hala’o mós palestra no enkontru ho governante médiu oriente nian no reprezentante sira setór privadu nian. Durante eventu ne’e, asina mós akordu ida servisu áereu nian sira ho Governu Eminadus Arábes Unidus. (*)
