Ba akordu ne’e sei asina husi Ministru Prezidénsia Konsellu Ministru, Fidelis Leite Magalhães no Vise-Prezidente MCC nian, Cameron Alford, iha serimónia ida ne’ebé sei hala’o iha Ministériu Negósius Estranjeirus no Kooperasaun.

Tanba investimentu ne’e sei haree ba projetu prinsipál rua, ida atu hadi’a sistema bee, saneamentu no drenajen no ida seluk iha área edukasaun no formasaun nian.

Nune’e inklui tratamentu ba bee, ezgotu, sistema drenajen, reforsu ba instituisaun no entidade reguladór sira, no kriasaun abastesimentu sólidu ida ba bee no ezgotu ba uzu doméstiku. Tuirmai sei inklui Sentru Eselénsia Foun ida ba formasaun profesór foun sira ne’ebé sei garante padraun kualidade no lideransa nian.

Husi totál ne’ebé kalkula ona hamutuk dolar amerikanu millaun 484, dolar amerikanu millaun 420 sei disponibiliza husi MCC, no Governu Timor-Leste sei kontribui ho dolar amerikanu millaun 64.

Ho valór ne’ebé sei disponibiliza husi Timor-Leste sei aloka de’it ba projetu tratamentu bee, ezgotu no drenajen nian, husi osan sira-ne’e dolar amerikanu millaun 34 sei uza hodi halo ligasaun ba uma sira no hodi dezativa fosa ne’ebé iha.

Maibé restu dolar amerikanu millaun 30 sei utiliza hodi apoia instalasaun sistema konvensionál no ba instalasaun bomba bee nian.

Konsellu Administrasaun MCC nian iha fulan-dezembru tinan 2017, hili ona Timor-Leste, nu’udár nasaun ne’ebé kumpre rekizitu hodi implementa programa ida-ne’e ba promosaun kreximentu ekonómiku, ne’ebé aliña ho prioridade sira dezenvolvimentu nasionál nian.

Tanba ne’e, iha loron 21 fulan-jullu tinan 2018, Ministru Fidelis Magalhães no Vise-Prezidente Adjuntu MCC nian, Jonathan Brooks, asina ona akordu finansiamentu inisiál ida, ho valór dolar amerikanu rihun 750 hodi kria ekipa ida, ne’ebé integra iha programa Millennium Challenge Compact, ho misaun atu identifika setór ekonómiku sira ne’ebé sei dezenvolve durante implementasaun programa ne’e nian.

Ekipa Dezenvolvimentu Kompaktu ba Dezenvolvimentu Governu Timor-Leste (CDT-TL) nian ida-ne’e, ofisiálmente kria ona iha loron 25 fulan-marsu tinan 2019 no lidera husi Embaixadór Constâncio Pinto.

Husi loron 11 to’o 17 fulan-abríl tinan 2022, Ministru Fidelis Magalhães lidera delegasaun altu nível ida, ne’ebé kompostu husi reprezentante 14 entidade governamentál oioin, halo viajen ba Washington, iha Estadus Unidus Amérika (EUA), hodi halo negosiasaun akordu kompaktu ho MCC.

Serimónia asinatura ne’e sei marka prezensa husi membru Governu Konstitusionál daulau, Parlamentu Nasionál, Autoridade Munisipál, líder komunitáriu, reprezentante husi organizasaun públika sira, sosiedade sivíl no setór privadu, korpu diplomátiku no parseiru sira dezenvolvimentu nian. (*)