Maske tusan ne'e rasik mosu hahú husi primeiru Governu to'o mai iha Governu daualu konsege atinje valór millaun $5 maibé Emprezáriu Telekomunikasaun Timor Telecom seidauk simu pagamentu husi Governu.

“Ha'u sei haree ho Governu, señor Primeiru Ministru ema di'ak, nia la gosta deve osan. Nia mak Primeiru Ministru entaun favór ida ita nu’udar Primeiru Ministru, deve ne'e mai kedas husi Governu anterior, Doutor Rui mós uluk Primeiru Ministru no Maun Boot Xanana mós uluk Primeiru Ministru, avo Mari mós ne'e uluk, sira hothotu mak tenke haree para dívida ne'e selu ba Timor Telekom para bele halo nia investimentu seluk tan, ou bele hadi'a ita-boot sira-nia kondisaun”, dehan nia hafoin hala'o vizita ba edifísiu Timor Telecom iha Kaikoli, kuarta (13/07).

Ba dívida ida-ne'e, Estadu tenke sukat didi'ak tanba estadu rasik iha tinan lubuk ida nia laran la selu, membru Governu no Ministériu sira halo komunikasaun oioin, maibé haluhan la selu.

Tanba ne'e husu Estadu liliu Governu labele sai hanesan devedór depois ikus mai la selu.

“Purtantu ne'e la'ós failla Taur Matan Ruak nian, e ne'e mai kedas iha Primeiru Governu konstituisionál, ne'e sira hothotu, doutór Mari Alkatiri, Maun Boot Xanana, Rui de Araújo, Taur Matan Ruak. Maibé Taur Matan Ruak kala menus tanba foin mak ikus liu, totál dívida estadu nian 5 millaun”, hatete nia.

Husu Primeiru Ministru atu rezolve dívida hothotu, tana la'ós de'it problema Timor Telecom, maibé mós ih problema seluk liliu kona-ba sesta bázika ne'e.

“Sira bee sesta bázika ne'e kuitadu, sira fa'an sasán, entrega ba konsumidór ne'ebé Governu dejigna e depois la selu sesta bázika. Klaru ha'u hatene katak la'ós tanba Governu lakohi selu, birokrásia mak neneik tebtebes, ne'ebé problema ne'e la'ós Timor Telecom, ema timoroan lubun ida mak lahetan pagamentu”, dehan nia.

Diretór Diresaun Jurídiku Timor Telecom, Manuél Carcéres hatete, kona-ba kestaun dívida ne'e la'ós akontese iha Governu daualu maibé ne'e husi kedas Governu dahuluk.

Tanba ne'e, Timor Telecom mós haruka ona karta ba Primeiru Ministru, Taur Matan Ruak atu ho laran luak bele fó solusuan ba dívida refere.

“Ohin señor Prezidente hatete hira, ida-ne'e loos, ne'e la'ós oitavu Governu de'it, ne'e husi kedas primeiru Governu mak mai, sira selu tohik-tohik oituan e hein katak laran luak señor Primeiru Ministru nian bele rezolve tiha ida-ne'e. Ami mós haruka tiha ona karta dala-rua ba señor Primeiru Ministru haree ajuda oituan”, informa nia. (*)