Tuir informasaun ne’ebé www.tempotimor.com asesu iha pájina MTKI, kinta (07/07) katak, ajénsia rua asina akordu ofisiál refere tanba atividade Expo-Dubai ne’ebé mak Governu daualu organiza hodi partisipa iha Expozisaun Dubai 2020, iha EAU iha tinan ne’e nia laran.
Ba atividade asina akordu ne’e atu oinsá bele fasilita traballadór Timoroan ba servisu iha Dubai.
Iha serimónia asina akordu ne’e, Diretór Incanto Group, Joanico Jeronimo agradese ba Governu daualu liuhusi Ministériu Turizmu Komérsiu Industria (MTKI) ne’ebé partisipa iha Expozisaun Dubai 2020 nune'e loke dalan ba ajénsia rua ne’e hodi asina akordu atubele loke dalan ba Timoroan sira bele ba servsiu iha EAU.
Prezidente Arabian Centers Human Resources Group Jobs Global, Samer Salibi hatete, asina akordu ne’e hodi hametin liután kooperasaun atubele fasilita Timoroan asesu ba servisu iha EAU.
Entretantu iha serimónia ne’e partisipa husi Koordenadór Jerál ANED-TL, Manuel Vong, Diretór Jerál SEFOPE, Paulo Alves no ekipa delegasaun Timor-Leste iha Dubai. (*)