Diretora Nasionál Edukasaun Formasaun no Informasaun (DNEFI)-SEKOOP, Jacinta dos Santos hatete, prepara funsionáriu SEKOOP hamutuk 62 hodi tuir formasaun liliu kona-ba aprezentasaun matéria Kooperativa nia hodi organiza motiva ba komunidade sira ne’ebé hari’i Kooperativa iha terenu.

“objetivu katak sira ne’ebé mak mai tuir ne’e sira mai atu halo aprezentasaun kona-ba matéria Kooperativa oinsá sira iha Munisípiu ne’e sira bele ba mobiliza, organiza no motiva komunidade atu hari’i kooperativa oinsá sira-nia dominasaun matéria kooperativa nian ne’ebé mak dada ema nia atensaun no atubele sai membru kooperativa ida”, dehan nia ba www.tempotimor.com iha Salaun Federasaun Hanai Malu (FHM), Bairopite, segunda (13/06).

Teste selesaun ba formadór sira ne’e mak husi funsionáriu sira iha SEKOOP permanente husi Munisípiu, inklui OMM (Organizadór Motivatór no Mobilizadór) no funisionáriu kazuál no ajente funisionáriu iha SEKOOP nia hamutuk 62.

Antes teste kada formandu sira halo teste aprezentasaun kada matéria ne’ebé sira aprezenta ne’ebé akompaña husi Juri iha ema na’in-tolu, mentór kooperativa iha ema na’in-tolu, observadór no avaliadór husi   Insitituto Nasionál Dezenvolvimentu de Maun de Obra (UNDIMO).

Funsionáriu sira tuir teste selesaun tenke domina matéria sira liliu kona-ba kooperativa nia hodi fó formasaun ba membru no ema ne’ebé sai membru kooperativa ida atubele hatene matéria sira iha baze.

“Sra bele mai aplika ida ne’e no ita sei hare katak sé loos mak halo selesaun no se loos mak bele sai formadór ba kooperativa no parte seluk mós eduka no forma atu nune’e ema hothotu ne’ebé funsionáriu SEKOOP ne’e bele hatene sira-nia kna’ar atubele ba ko’alia ho komunidade oinsá ita bele transmite ideia atubele hari’i kooperativa ne’e jere oinsá kooperativa ne’e la’o oinsá ida ne’e mak nia objetivu”, esplika nia.

Ba teste selesaun ne’ebé mak sei la liu sei kontinua tuir formasaun iha tempu tuir mak atu nune’e loron ruma funsionáriu reprovadu hirak ne’e sei mós bele sai formadór ba kooperativa sira.

“Sira bele sai formadór nasionál no ba Munisípiu no sira ne’ebé la liu bele aprende tan”, dehan nia.

Matéria ba formandór ka ba membru sira ne’ebé tuir teste mak hanesan lei kooperativa, dekretu-lei kooperativa, prinisípiu valór kooperativa nian pilar internsionalmente, no kontabilidade no jestaun administrasaun kooperativa nian. (*)