“Ha’u ta’uk katak alokasaun ba fundu ida-ne’e la ekuitavel ka proporsionál. Alokasaun ne’e ninia foku loloos tenke buka atu ajuda ema sira-ne’e, no la’ós ba grupu sidadaun espesífiku ki’ik ida, la haree ba sira-nia importánsia istórika. Tanba razaun hirak-ne’e, ha’u iha intensaun atu husu Tribunál Rekursu atu revee lei kona-ba Orsamentu Retifikativu”, dehan PR Horta liuhusi Komunikadu Imprensa ne'ebé www.tempotimor.com asesu husi Gabinete Prezidente Repúblika, segunda (13/06).

Tanba ne'e, lei Grande Opsan Planu tinan 2023 ne'ebé promulga dadaun ona, mak Xefe Estadu hakarak fó-hatene momoos katak, iha aspetu balu ne’ebé Governu planea maibé Prezidente sente ladún konfortável.

Tanba haree husi orsamentu planeadu totál ho montante $3.155.715.306 ba tinan 2023, no $1.000.000.000 aloka tiha ona ba estabelesimentu Fundu Veteranu Nasionál.

Dala ruma mós haree filafali ba esplikasaun sira ne’ebé detalladu liután kona-ba estratejia ba aplikasaun fundu ida-ne’e bele halo sosiedade no Xefe Estadu rasik laran hakmatek.

Maibé ida-ne’e la siknifika katak alokasaun orsamentu ba sira iha Orsamentu Retifikativu foin lalais ne’e apropriadu atu realiza saída mak Governu hakarak atu halo hodi hamenus nível moris-kiak ne’ebé iha ohin-loron.

“Fó 90% husi Orsamentu Retifikativu totál atu ajuda 1,75% husi populasaun tomak parese tuir ha’u nia haree hanesan la justu no la ekuitavel. Nune’e mós buat ne’e parese la adaptada atu realiza objetivu ne’ebé deklaradu atu ajuda membru populasaun sira ne’ebé afetadu tiha ona, no loroloron afetadu ho maka’as liu hotu husi efeitu sira dezastre naturál nian no situasaun ekonomia globál atuál”, dehan nia.

Maske nune'e Prezidente Repúblika mós fiar katak alokasaun ne’e ninia foku loloos tenke buka atu ajuda ema sira-ne’e, no la’ós ba grupu sidadaun espesífiku ki’ik ida, la haree ba sira-nia importánsia istórika.

“Ha’u fiar katak tanba sira-nia patriotizmu no kna’ar sira-nian istorikamente iha luta ba ita-nia ukun an no ba Timor-Leste ida ne’ebé livre no dezenvolvidu, sira sei komprende preokuasaun hirak-ne’e. Liliu tanba buat ne’ebé importante liu hotu, aleinde asuntu igualdade sosiál, mak sustentabilidade ekonómiku no finanseiru ba rai ida-ne’e, ne’ebé sira-hotu hadomi no luta atu liberta”, afirma nia.

Dadaun Xefe Estadu rasik husu Tribunál Rekursu atu revee lei kona-ba Orsamentu Retifikativu tanba meiu ida-ne’e nu’udar parte ida husi prosesu demokrátiku atu asegura funsionamentu normál no saudável ba nasaun nia instituisaun sira.

“Kestiona lei sira, ne’ebé hamosu dúvida, husu konsiderasaun tuir dalan imparsiál, liuhosi juiz sira iha Tribunál Rekursu, sai hanesan dalan ida tuir nia kompeténsia sira, ne’ebé fó fatin ba Prezidente atu hala’o nia funsaun nu’udar garantidór ba legalidade konstitusionál”, haktuir nia.

Tanba ne'e Tribunál Rekursu iha kompeténsia eskluziva atu deside kona-ba konstitusionalidade lei sira-nian, karik tuir nia avaliasaun, Tribunál Rekursu konsidera katak iha iregularidade konstitusionál sira relasiona ho alokasaun fundu hirak-ne’e, akordaun ne’e sei nesesariamente ezije emenda ba Planu Opsaun Boot sira ba tinan 2023 ho nune’e labele iha objesaun ba promulgasaun. (*)