Xefe departementu peskiza baze de dadus, José Alarico Santos Lopes, hatete, husi formasaun ne’e, atu eleva grupu kooperativa sira nia koñesementu, tanba barak seidauk hetan formasaun kona-ba kontalibidade nian.
Nune'e, liuhusi formasaun refere, grupu kooperativa sira bele ona halo relatóriu mensál ho anúal nian hodi relata ba autoridade lokál inklui SEKOOP rasik.
"Sira hetan formasaun báziku para estabelese sira nia kooperativa, oinsá atu jere sira nia finanseira, jestaun hirak ne'e, tenke liuhusi prosesu kontabilidade kooperativa nian, entaun formasaun ida ne'e ba sira kooperativa ne'ebé sira jere bele uza ona sistema kontabilidade," dehan nia iha salaun apuramentu Baukau, kuarta (01/06).
Partisipante, husi kooperativa multi setóral Roman Furak Fatumaka, Joanina de Araujo Monteiro, sente kontente ho formasaun, tanba bele kapasita ona husi área kontabilidade nian oinsá atu halo relatóriu hodi relata ba nasionál.
"Formasaun ne'e impotante, tanba ami nu’undar foinsa'e kapasita ami oinsá sai dirijente ba kooperativa nian, tanba ne'e oportunidade ida mai ami," nia hatete
Husu ba parte SEKOOP atu nafatin kapasita kooperativa sira iha teritóriu nasionál, inklui suporta foinsa'e sira atu harii kooperativa, tanba iha vantajem maneja no hatauk ema atu deve osan.
"Kooperativa ne'e impotante, tanba hanorin ita maneza osan no rai osan, i hanorin ita mós tauk atu deve," nia akresenta
Entretantu SEKOOP kapasita grupu kooperativa sira iha Munísipiu Baukau hamutuk 13 durante loron 5. (*)
