“Projetu Dekretu-Lei ida-ne’e hetan ona aprovasaun iha sorumutuk Konsellu Ministrus iha loron kuarta seman kotuk, loron 06 fulan-maiu tinan 2022, maibé tanba alterasaun balun mosu iha faze redasaun finál nian, tenke submete fali ba Konsellu Ministrus atu aprova”, dehan Ministru Prezidénsia Konsellu Ministru (KM), Fidelis Manuel Leite Magalhães, iha Palásiu Governu, segunda (09/05).

Tanba dekretu-Lei ida-ne’e estabelese rejime espesiál aprovizionamentu ne’ebé haree liu ba ezekusaun medida UKL+. Ho rejime foun ida ne’e ba oin sei prevee opsaun rua.

Ho opsaun sira ne’e mak ida, atribuisaun subvensaun liuhusi estrutura suku PNDS, no daruak mak posibilidade atu halo aprovizionamentu sentralizadu, hodi bele hetan ekonomia eskala no poupansa ba rekursu ekonómiku.

Programa ne’e ho objetivu atu hadi’a kondisaun sira abitalidade husi uma ne’ebé sai nu’udár hela-fatin permanente ba uma-kain sira ne’ebé vulneravel liu, bainhira uma sira ne’e aat hela no uma-kain sira ne’e la iha uma seluk atu hela ba.

Ba Uma-kain ne’ebé vulneravel liu, iha kontestu ezekusaun programa UKL+, mak sira ne’ebé ninia rendimentu médiu loroloron la liu dolar amerikanu 1.25 (dolar amerikanu ida no sentavu ruanulu-resin-lima) no ne’ebé sira-nia uma ne’e aat hela.

Uma-kain ne’ebé vulneravel liu, bele benefisia tuir modalidade, apoiu finanseiru ba obra benefisiasaun, konservasaun ka reparasaun husi ninia hela-fatin, to’o valór másimu dolar amerikanu 13.000 (dolar amerikanu rihun-sanulu-resin-tolu), no Apoiu liuhusi materiál sira konstrusaun nian ba substituisaun materiál sira kobertura no revestimentu husi ninia hela-fatin, to’o valór másimu dolar amerikanu 4.000 (dolar amerikanu rihun-haat). (*)