“Ohin ne'e Oekussi mós mai promove website ida ke fó informasaun barak kona-ba Turizmu iha Oekussi, Turizmu iha ne'ebá ne'e hahú dadauk ona, primeiru ne'e hatudu katak ita Timor-Leste iha sidade ida ke moos tebes iha Oekussi”, dehan Prezidente Autoridade RAEOA, Arsenio Paixão Bano iha Mezeu Rejisténsia, sesta (06/05).

Tanba ko'alia kona-ba turizmu iha Oekussi, ida ne'e iha tinan kotuk liubá parte autoridade RAEOA servisu hamutuk ho PNUD kria ona website ida atubele fasilita informasaun ida ne'e ba públiku atubele ba vizita Turizmu komunitariu iha Oekussi.

Maske Oekussi ne'e hanesan sidade ki’ik ida maibé bele oferese ba sé de'it atu vizita. Tanba iha Oekussi ne'e iha konsiensilizasaun ba komunidade sira, nomós kompriende katak Turizmu ne'e fó benifísia, e benifisiu ba produtu na'in sira ne'ebé mak kuda modo, hakiak manu, inklui buat sira seluk.

“Kuandu ema ba vizita Oekussi, sira hán modo, sira ne'ebé mak kuda modo ne'e sei hetan, sira hakiak manu sei hetan hahán, wainhira ema vizita Oekussi, tanba ne'e ita tenke iha website ida para hatudu fatin ba ita-boot sira bele vizita”, esplika nia.

Dadauk ambiente ne'ebé mosu, mak ema bele la'o de'it iha Oekussi laran mós furak ona, sa tán sira ba fatin balun hanesan iha Oesiliu, Pásabe, nomós Oekussi, iha tasi iha beleza, no fatin furak barak tebes.

Tanba ne'e bainhira iha vizita ruma mak ba vizita maka Oekussioan sira mós sei simu ho di'ak no kontente.

Ho kriasaun website ida ne'e sei publika sai informasaun hothotu ligadu ho turizmu komunitariu iha Oekussi, atu ema bele haree no ba vizita.

Partisipante sira ne'ebé partisipa abertura promusaun ba website turizmu komunitáriu RAEOA ne'e, mai husi reprezentante PNUD, Vise-Ministra Turizmu Komunitáriu no Kultural, Inácia da Conceição Texeira, estudante universitáriu sira, inklui mos partisipante sira seluk. (*)