“Ha’u hakarak agradese Timor Verde no UNDP no aman liurai sira no oan joven sira ne’ebé halo ona fatin oan ida ne’e, ha’u kontente loos, ha’u ohin mak hatene katak iha problema téknika balun, ohin ha’u fó ona autorizasaun ba sira esplora ida ne’e”, hatete PM Taur ba jornalista sitra hafoin ho Autoridade Suku vizita fatin refere.

Iha buat ne’ebé Xefe Governu husu primeiru mak jere lixu fatin, organiza halo didi’ak no kontente haree fatin lixu nian tama mai ne’e iha hotu, segundu presiza iha hariis fatin ba labarik sira mai, ema boot mai, ferik katuas sira.

“Entaun casa de banho tenke iha, terseiru mak sira tenke kontribui para kuda nafatin Aí-Parapa sira ne’e para halo fatin buras nafatin, kapás nafatin e fila fatin ne’e ba fonte rendimentu ida ba sira no família sira”, dehan Taur.

Tanba iha inisiativa komunitária husi jere fatin ekoturizmu ho di’ak no ho kuidadu, hodi hatutan, fatin sira ne’e bele sai fatin atraitiku ba turista sira hosi li’ur, liuliu Australianu sira, tanba daudaun ne’e iha ona koneksaun voo entre Austrália ho Timor-Leste via Qantas, no turista Australianu sira bele mai paseiu ba fatin sira refere, importante mak halo jestaun ho di’ak no ospitalidade. (*)