“Sua Eselénsia Primeiru-Ministru hanesan Xefe de Governu, bolu ha’u ho Sua Eselénsia Vise Minsitru Administrasaun Estatál mai para halo despaxu no diskute kona-ba programa Ministeriu Administrasaun Estatál ninian liliu programa sira ne’ebé relasiona ho uma kbi’it la’ek no uma kbi’it la’ek plus ne’ebé foin dadaun Governu deside ona paraké liuhusi orsamentu retifikativu ne’e”, informa Ministru Administrasaun Estatál, Miguel Pereira de Carvalho ba Jornalista sira, iha pálasiu Governu, kinta (28/04).

Tanba ne’e, atu halo tan uma kbi’it la’ek ba populasaun sira ne’ebé vurneravel liuhusi distribuisaun material konstrusaun nomós liuhusi fó kalen (zinku) ba populasaun sira portantu hanesan Governu Konstituisionál daualu foin dadauk aprova ona alterasaun lei Orsamentu Jerál Estadu 2022 nian iha 13 medidas ne’ebé mak proposta ba Parlamentu Nasionál.

“E uma medidas proposta mak iha tinan ida ne’e atu ita distribui material konstrusaun ba populasaun sira kbi’it la’ek ne’ebé mak atu halo sira-nia uma rasik mas tambem fó ba ita-nia populasaun sira ne’ebé mak uma kalen frujen para sira troka kalen sira ne’e rasik, ohin ha’u mai informa Ministériu Administrasaun iha kondisaun atu implementa medidas ida ne’e bainhira orsamentu retifikativu ne’e aprovadu husi Parlamentu Nasionál no orsamentu ne’e promulgadu ona husi Prezidente Repúblika”, dehan Ministru Miguel.

Pograma ne’e realiza nia benefisiariu ne’e populasaun sira iha aréa rurál, suku, aldeia tanba haree populasaun sira aréa rurál ne’e barak mak uma kondisaun ladi’ak balun uma piku, balun uma kuaze atu monu no anin atu sobu no populasaun barak mak moris uma ladi’ak.

“VIII Governu Konstituisionál preokupadu tebes ho populasaun sira-nia kondisaun moris hakarak garante katak programa sira ne’ebé nia halo atu prienxe saida mak temi iha ita-nia Konstituisaun hateten Estadu tenke halo esforsu hotu para ita-nia populasaun sira bele moris iha uma ne’ebé mak dignu, nune’e nia mekanizmu implementasaun sei seribisu ho autoridade lokal sira liliu Administradór de Munisípiu, no Prezidente Autoridade no Administradór Postu sira nomós ekipa Programa Nasional Dezenvolvimentu Suku (PNDS) atubele identifika prioridade sira no akompaña programa sira ne'e realiza”, afirm nia. (*)