Ministru Prezidensia Konsellu Ministru, Fidelis Leite Magalhães hatete, KM aprova projetu Dekretu-Lei ida no projetu Dekretu Governu rua, iha ámbitu husi Lei enkuadramentu ba Orsamentu Jerál Estadu no ba jestaun finanseira públika nian, ne’ebé aprezenta husi Ministru Finansas, Rui Augusto Gomes.

“Projetu Dekretu-Lei nian ne’ebé ninia objetivu maka halo regulasaun ba Kompeténsia atu autoriza realizasaun despeza nian husi servisu no entidade sira Setór Públiku Administrativu nian”, esplika Fidelis iha Palásiu Governu, kuarta (27/04).

Ho diploma ida-ne’e, bainhira despeza iha valór dollar amerikanu millaun 10 ba leten, Konsellu Ministrus mak iha kompeténsia atu fó autorizasaun ba realizasaun despeza.

“Bainhira despeza sira hanesan ka menus husi dolar amerikanu millaun 10, órgaun diresaun servisu no entidade sira Setór Públiku Administrativu nian ho autonomia finanseira alargada mak iha kompeténsia atu fó autorizasaun ba realizasaun despeza”, dehan nia.

Ba órgaun sira diresaun sira Prezidénsia Repúblika, Parlamentu Nasionál no Munisípiu nian sira iha kompeténsia atu autoriza realizasaun despeza, la haree ba ninia valór.

Iha Rejiaun Administrativa Espesiál Oekussi Ambenu nian, órgaun deliberativu rasik mak iha kompeténsia atu fó autorizasaun ba despeza ho valór dolar amerikanu millaun 10 ba leten.

Nune’e mós Projetu Dekretu Governu nian ne’ebé halo regulamentasaun ba estrutura kasifikadór orsamentál nian sira.

“Espesifikasaun reseita no despeza sira Orsamentu Jerál Estadu nian sei halo liuhusi utilizasaun ba klasifikadór orsamentál sira, ne’ebé sai nu’udár estrutura klasifikasaun orgánika, klasifikasaun ekonómika no klasifikasaun funsionál”, hatete nia.

Ba Projetu Dekretu Governu ne’ebé halo regulamentasaun ba estrutura programa orsamentál nian sira. Tanba estrutura liuhusi programa Orsamentu Jesrál Estadu nian mak agrupamentu despeza sira husi objetivu, atubele prodúz rezultadu sira.

Programa orsamentál sira sei organiza liuhusi nível tolu, ne’ebé iha leten, hanaran programa, ida ne’ebé iha klaran hanaran subprograma no ida ne’ebé iha okos hanaran atividade.

Iha nível programa aprezenta objetivu jerál sira atu hetan rezultadu sira, nível subprograma aprezenta objetivu espesífiku sira ho atu hetan rezultadu sira no nível atividade aprezenta asaun lubuk ida ne’ebé kontribui atu prodúz rezultadu sira.

Kódigu ba programa orsamentál sira ne’e kompostu husi algarizmu alfanumériku hitu, husi algarizmu hitu ne’e tolu dahuluk koresponde ba nível programa, algarizmu rua tuir-mai koresponde ba nível subprograma no algarizmu rua ikus koresponde ba n’ivel atividade nian.  (*)