Tuir informasaun ne’ebé www.tempotimor.com asesu husi pájina AIFAESA, kuarta (27/04) katak, Ekipa operasionál AIFAESA,IP, DO no DMP lidera diretamente husi Diretór Departamentu Metrolojia no Padronizasaun (DMP), Julito Salsinha Gomes, realiza inspesaun ba loron dahuluk iha Postu Administrativu Maliana Vila.
Iha inspesaun ne’e, ekipa vizita estabelesimentu hamutuk limanulu-resin-haat (54) kompostu husi loja, keoske, restaurante, ofisina, alfaiate, loja vestuáriu no mebel.
Iha ne’e, rezulta prosesu ba estabelesimentu ida (1), ne’ebé komersializa produtu ai-hán liu prazu hanesan, Biskuit Gabin pakote plástiku 4.
Nune’e mós, estabelesimentu rua (2) seluk hetan konvokatóriu, tanba la aprezenta autorizasaun komersiál válidu ne'ebé emite husi Serviço de Registo e Verificação Empresarial (SERVE).
Entretantu, inspesaun ne’e realiza ho koordenasaun di’ak hosi Prezidente Autoridade (PA) Munisípiu, Ernesto Oliveira Barreto, ho ekipa PNTL Postu Maliana. (*)