Diretór Servisu Edukasaun Munísipiu Baukau, Augosto Ornai Ximenes, hatete, anu fiskal tinan-2022, husi fulan-janeiru to'o fulan-marsu, kombustivél ba karreta no motor iha servisu edukasaun Munísipiu Baukau laiha.
"Loos duni ba anu fiskal ida ne'e, to'o ona marsu nia rohan mais, kombustivél laiha, ida ne'e difikulta ami nia monitorizasaun ba programa PKRIE," dehan Augosto ba www.tempotimor.com iha salaun sentru konvensaun baukau vila antiga, kuarta (30/03).
Grupu komunitáriu ezize ba konsultór no tekníku atu nafatin prezensa iha tereñu hodi observa prosesu konstrusaun no reabilitasaun edifísiu eskola kompostu husi eskola 29, maibé labele ba tereñu, tanba kestaun kombustivél laiha.
"Ida ne'e kompetensia Prezidente Autoridade nian, tanba ami diresaun servisu Munísipal sira hetan beins servisu liga ho kombustivél, Prezidente Autoridade mak hatene," dehan nia
Projetu 29, ne’ebé kompostu projetu reabilitasaun ba eskola foun 26 foti ona osan pursentu 25, maibé reabilitasaun ba eskola ensiñu báziku Abulir, Lalulai, no Osofulari seidauk foti, tanba kestaun iklima.
Bainhira konstrusaun hahú sór betón, sei hetan monitorizasaun husi ékipa tekníku husi Ministéiru Obras Públiku (MOP) liuhusi Ajésia Dezenvolvimentu Nasionál (ADN) no iha projetu 26 mak dadaun hahú ona servisu.
Entertantu projetu refere estabelese iha Postu Adminisitrativu Baguia, Baukau vila, Laga, Kelikai inklui Venilale.
Projetu refere utiliza orsamentu husi transferensia publiku tinan-2021 ho montante US$302, 014 resin. (*)
