“Organizasaun Nasaun Unidas (ONU) liuhusi Fundu Objetivu Dezenvolvimentu Sustentavel (ODS) apoiu ba ajénsia organizasaun tolu iha Timor-Leste hanesan, World Food Programme (WFP), Food and Agrikultura Organization of the United Nations (FAO) no World Health Organization (WHO) iha Timor-Leste, simu kontribuisaun osan dólar amérikanu millaun ida husi funu ODS, atu implementa programa rua hanesan reforsa sistema nasionál ai-hán no promove redusaun risku dezastre naturál iha Timor-Leste”, dehan Reprezentante WFP iha Timor-Leste, Dageng Liu, iha salaun City 8, Manleuana, kinta (31/03).

Fundu refere sei ajuda ajénsia tolu atu iha forsa sistema ai-hán nasionál no implementa atividade redusaun risku dezastre naturál liuhusi servisu parseria ho Minustériu Agrikultura no Peskas nomós Ministériu Saúde Timor-Leste.

Tanba iha Timor-Leste, Planu Estratejiku Dezenvolvimentu trasa vizaun jerál nasaun nian ba tranzisaun husi nasaun ne'ebé seidauk dezenvolvidu ba nasaun ne'ebé iha rendimentu ekonomia naton iha tinan 2030, ho populasaun ne'ebé saudavél no seguru.

Iha vizaun ne’e define setór agrikola ninia objetivu, inklui hadi'a sistema nasionál seguransa ai-hán, redusaun pobreza rurál, no promove sustentabilidade no konservasaun ba Timor-Leste ninia rikusoin rekursu naturál.

“Projetu ida ne'e diretamente sei liga ba vizaun longu prazu nasaun nian”, hatete nia.

Reprezentante WHO iha Timor-Leste, Arvind Mathur hatete, iha projetu ne'e kobre fornesimentu no demanda ba ai-hán, no halo promosaun ba ambiente politika ai-hán seguru no saudavel, nomós mudansa hahalok ba nesesidade konsumidór sira bele harahun sikulu mánutrisaun ba jerasionál sira liliu ba grupu vulneravel sira hanesan feto no labarik sira.

“Projetu ne'e mai iha tempu ne'ebé loos no importante atu hamenus estragu ai-hán liuhusi redusaun estraga ai-hán durante tempu koilleta, no ida ne'ebé bele hasa'e produtividade no asesu ba ai-hán, no proteje ekosistema. Nomós asegura katak produtór lokál sira bele tama iha merkadu ne'ebé seguru, liuhusi politika advokasia, no asegura mós insentivu ba sustentabilidade korrente fornesimentu ai-hán”, dehan nia.

Koordenadar Rezidente ONU iha Timor-Leste, Roy Trivedy hatete, program konjuntu ida ne'e sei foku ba halo mudansa transformativu hodi rezolve ba problema mánutrisaun, seguransa ai-hán, menus produtividade agrikola iha Timor-Leste no ida ne'e liga diretamente ho kometimentu konjuntu ba Kuadru Kooperasaun Dezenvolvimentu Sustentavel Nasaun Unidas nian, ho hanoin atu kontribui no aselera progresu ba Meta Objetivu Dezenvolvimentu Sustentavel.

Parseiru dezenvolvimentu hamutuk sanulu-resin tolu mak apoiu Fundu Konjuntu ODS ne'e, inklui Uniaun Europeia, Denmark, Alemaña, Irlánda, Luxembur, Monako, Norvegia, Portugal, Repúblika Korea, España, Swedia, Suisa, no Olanda. (*)