Xefe Suku Afaloikai, Jermano João Baptista, hatete, UKL faze primeiru uma tolu ne'ebé implementa iha Suku Afaloikai, konstrusaun la'o ona ba oin, maibé besi kanal C laiha kualidade no la merese lori harii uma iha área rurál, tanba fasil ba anin boot atu mosu sobu.

"Sim besi ne'e laiha kualidade, besi mihis ita haree didi'ak anin bele sobu, no mós prezudika badaen sira nia vida, ida ne'e sira manan tender (Kompañia Simples) mak sosa, besi kualidade aat," dehan Jermano ba www.tempotimor.com iha salaun sentru konvensaun Baukau vila antiga, kinta (31/03).

Nune'e, hato’o ona karta, maibé Diretóra Programa Nasionál Dezenvolvimentu (PNDS) Munísipiu, no ba Diretóra Jerál PNDS nasionál, resposta mai katak, besi refere kualidade di'ak no tuir BQ.

"Dezeñu BQ bele muda, lei mak labele muda, iha ami nia rai ne'e, ami mak hatene, dezeñu BQ halo lacocok ba ami nia rai, tanba esperensia kotuk SMU Taur Matan Ruak anin sobu tomak, SD públiku Ossohuna anin sobu lori tomak, tanba ne'e besi kanal C lacocok ba ida ne'e," nia argumenta

Nafatin fó hanoin ba parte PNDS nasionál no Munísipiu, atu hola karik besi modelu kanal C, maibé tenki iha kualidade hodi bele satan iha tempu anin boot.

"Agora sira obriga halo de'it, entaun Programa Nasionál Dezenvolvimentu Suku, maibé imi tau fali Programa Nasionál Dezenvolvimentu Nasionál, entaun imi halo tuir imi nia hakarak," nia hatete

Enkuantu UKL ba faze primeiru iha Suku Afaloikai, foin atinji pursentu 50, tanba kondisaun estrada la diak difikulta transporta materiál, rai-henek no seluk tán.

UKL faze primeiru implementa iha Aldeia Buibela, kompostu uma-3, uma-2 konstrui besik fatin sede Suku, ida seluk iha liu Aldeia Buibela, ne’ebé husi Suku ba ho distánsia kilomentru-7.

"UKL ne'ebé implementa iha Buileba atu ba hola rai henek iha sana, ita konta kilomentru-27, husi área Afaloikai ba hola iha área Uatukarabau nian rinkit mós kona 40 kilomentru hanesan ne'e, tanba ne'e UKL ba faze primeiru sei hakdasak hela," nia afirma

Alende UKL faze segundu konklui ona verifikasaun família kbi'it la'ek na'in-9 sai benefisiáriu.

"Fatin sira prepara prontu ona, hein PNDS husi Munísipiu tun ba halo metru ba uma nia medida," nia dehan

UKL faze primeiru tarde, tanba implikasaun husi kondisaun estrada ne’ebé la diak no faze segundu, dadaun komunidade sira hahú servisu voluntáriu halo estrada ba Aldeia Lena nian atu fasilita transporta matérial konstrusaun, enkuatu Aldeia-2 seluk hanesan Aldeia Okilari no Uaimata, kondisaun estrada sei di'ak oituan.

UKL faze segundu sei implementa iha Aldeian Lena uma-3, Okilari uma-3, Uaimata uma-3.

Suku Afaloikai kompostu husi Aldeia-4 hanesan, Buibela, Lena, Okilari, Uaimata, total xefe família 248 no populasaun hamutuk 1203. (*)