Tempotimor (Dili)-Xefe Estadu Maior Falintil-Forsa Defeza Timor-Leste (F-FDTL), Tenente Jenerál Falur Rate Laek informa, dadauk ezekusaun Orsamentu Jerál Estadu (OJE) tinan 2022 husi F-FDTL nia iha trimester dahuluk, konsege atinje pursentu sanolu-resin-ida (11%).
“Loloos ne'e, ami implementa ona to'o pursentu 25, ami seidauk, horibainrua ha’u hatete ne'e foin mak pursentu 11oituan mais ne'e tékniku mak bele esplika buat ne'e, ha’u la'ós tékniku, ha'u politiku”, dehan Falur, hafoin halo enkontru semanál ho Prezidente Repúblika (PR), Francisco Guterres ‘Lú Olo’, iha Palásiu Prezidensiál, Bairopite, kuarta (30/03).
Ba alokasaun Orsamentu Jerál Estadu 2022 ne'e, implementa no ezekuta tiha ona, maibé buat ne'ebé mak sira ko'alia ho Prezidente Repúblika nu’udar Komandante Supremu mak orsamentu ne'ebé hala'o ligasaun ho lei programasaun militar nian ne'e.
Antes ne'e, Parlamentu Nasionál (PN) aprova OJE hamutuk ho totál millaun $25,527,233 ba FALINTIL-Forsa Defeza Timor-Leste (F-FDTL) ho rezultadu votasaun a-favór 52, kontra 0 no abstensaun 12.
Husi valór orsamentu ne'e, saláriu vensimentu $10,756,000, bens servisu $14,771,233, kapitál menór, kapitál dezenvolvimentu no transferénsia públika laiha, no husi orsamentu ne’e sei finasia ba programa tolu, sub-programa lima no atividade 11.
Iha programa defeza nasionál prevee $22,930,372, programa boa-governasaun no jestaun instituisionál prevee $2,566,861 no programa igualidade jéneru no inkluzaun sosiál prevee $30,000.
Programa defeza nasionál ho nia sub-programa defeza militár nia atividade mak garante misaun operasionál F-FDTL, moderniza infraestrura no ekipamentu militár.
Haree ba Sub-programa rekursu umanu ba prestasaun servisu ho nia atividade jestaun rekursu umanu ba prestaun servisu.
Ba programa boa-governasaun no jestaun instituisionál ho nia sub-programa rua no atividade haat.
Entretantu, programa igualidade jéneru no inkluzasaun sosiál ho nia sub-programa implementasaun NAP-rezolusaun 1325 (2000) ONU kona-ba WPS ho nia atividade estabelese unidade jéneru, aspeitu integradu jéneru iha kuríkulu, promove lideransa no kapasidade feto iha F-FDTL, sensibilizasaun motiva feto iha militár no implementasaun abordajen integradu igualidade jéneru. (*)
