"Tuir tarjetu, dadus ne'ebé ami iha mais ou menus rihun 11 hanesan ne'e," dehan supervaizór EDTL.ep Baukau, Edegar Pinto ba www.tempotimor.com iha kna'ar fatin vila nova, sabadu (26/03).
Prepagu hamutuk 6.000, ne'ebé EDTL.ep Baukau simu husi nasionál iha fulan-novembru tinan-2021 no hahú kedas monta husi Postu Adminisitrativu Vemase, Venilale, dadaun to'o ona Postu Adminisitrativu Kelikai, re-instala ona prepagu hamutuk 4.760 unidade.
Restu ba prepagu ne'ebé sei iha hamutuk 1.240 no tuir planu sei monta hotu iha fulan-tolu tuir mai.
"Restu ne'e hotu, ami sei ba nasionál foti tán mai para alkansa ami nia instalasaun ne'e," nia hatete
Entetertantu Munísipiu Baukau, kada uma ka'in ne'ebé iha ona prepagu mak, Postu Vemase no Venilale, enkuantu iha Postu Bakau vila, Laga, uma ka'in balun seidauk iha prepagu, no postu Baguia kuaze uma ka'in hotu seidauk iha prepagu, maibé parte EDTL.ep Baukau sei esforsu hodi instala hotu.
"Agora monta iha postu kelikai, finaliza tán, ami sei tama postu Laga foho ba leten remata to'o iha postu Baguia nian, iha Baukau vila balun seidauk ita monta, ami sei tenta para rejolve problema sira ne'e, seidauk monta karik ami buka tuir para monta hotu," nia hatete
Durante EDTL.ep Baukau halo instalasaun prepagu ba kada uma ka'in, kuaze komunidade hotu iha koperasaun di'ak, maibé iha problema seluk mak dalan no inklíma.
"Preukupasaun ne'e mak ami ba postu sira ne'e estrada ladi'ak no udan, maibé komunidade iha koperasaun di'ak, tanba molok ami tama halo re-instala prepagu ne'e fó uluk karta koñesementu ba autoridade lokál sira," nia dehan
Dadus provizóriu husi EDTL.ep Baukau, uma ka'in ne'ebé seidauk halo re-instalasaun ba prepagu iha Munísipiu Baukau hamutuk 5.471.
Alende ne’e, www.tempotimor.com tenta husu reseita ne'ebé durante tinan-2021 EDTL.ep Baukau hatama ba kofre estadu, maibé labele fó sai, tanba parte EDTL.ep Munísipal laiha kompetensi atu fó komentáriu.
Totál funsionáriu iha EDTL.ep Baukau hamutuk na'in-55 kosmpostu husi kazual na'in-10. (*)